Li Girtîgeha Şakranê ya Zarokan hat îdiakirin ku zarokê 17 salî Alî Erdogan ku ev 2 meh bûn girtî bû, di 4’ê nîsanê de li odeya xwe întîhar kiriye.
Der barê mijarê de malbata Erdogan axivî û diyar kir ku li ser bedena zarokên wan Erdogan şopên reş û şîn hene. Pismamê Erdogan, Abdulkadîr Erdogan anî ziman ku rêveberiya girtîgehê gotiye ku di şemiya borî saet di 19.00’an de bûyer çêbûye.
Erdogan bi domdarî jî ev agahî dan: “Tu sedemeke ku pismamê min întîhar bike nîne. Dibe ku ji bo întîharê zext lê hatibe kirin. Ev du meh bû girtî. Me di got dê bi vê qanûna înfazê re bê berdan. Mirovekî bi coş bû û têgehiştî bû. Heta psîlokogê girtîgehê jî got ku kesekî pir keyfxweş bû. Dê li Saziya Tipa Edlî ya Îzmîrê testa vîrûsa koronayê bê kirin. Di morgê de me cenazeyê Alî dît. Laşê wî reş û şîn bûbû û şop lê hebûn. Me pirsa vê kir lê bersiv nedan me. Çi bi Alî hatiye, çima jiyana xwe ji dest daye em nizanin. Rêveberiya girtîgehê jî agahî nade. Cenazeyê me jî nedane me. Em li benda encama testê ne.”
Malbata Erdogan serî li Şaxa ÎHD’ê ya Îzmirê dan û alîkariya hiqûqî xwest. ÎZMÎR
