Bi şewba koronayê re li seranserî cîhanê dewletan ji bo ku pêşî li belavbûna şewbê bigirin, hişyariya nederketina ji malan li welatiyên xwe kir. Ji bo vê jî budçeyeke mezin veqetandin û pere didin gel. Lê li Tirkiyeyê rewş bi temamî berevajî vê ye. Hikûmeta AKP-MHP’ê pere ji gel dixwazin. Ev jî têrê nake ku hikûmet alîkariya ku hatiye berhevkirin jî tenê li alîgirên xwe belav dike.
Serokkomarê dewleta tirk Tayyîp Erdogan diyar kir ku li zêdetirî 2 milyon mirovî alîkariya pereyan hatiye kirin. Lê belê tenê li Wanê bi hezaran malbatên xizan û bêkar nikarin alîkariyê werbigirin. Erdogan îdia kiribû ku xizan û bêkar dikarin serî li walîtî û qeymeqamtiyan bidin. Li ser vê yekê bi hezaran kesan serî li van saziyan dan. Lê encamek ji van serlêdanan derneket.
Hat zanîn ku piraniya alîkariyê li kesên di rêxistinên AKP’ê de cih digirin hatiye belavkirin. Der barê mijarê de welatiyekê ku di malbata wî de 8 kes hene û bêkare axivî û wiha got: “Rewşa me nebaş e. Ji bo alîkariya behsa xeberê min serî li qeymeqamtiyê da. Lê gotin; ‘Em serlêdanên ji bo alîkariyê wernagirin.’ Alîkariyê nadin mirovên xizan û bêkar. Kesên ku AKP’ê beriya niha navê wan nivîsandibûn didin wan. Alîgir û xizmên rêveberên AKP’ê yên bajar û navçeyan alîkarî wergirtin.” WAN
