Navenda Nûçeyan |
Li peravên Maltayê keştiyek ji 260 koçberan pêk dihat winda bû û tu agahî jê nayên girtin. Hikûmet bêdeng in û saziyên navneteweyî û rêxistinên civakî yên sivîl jî bi fikar in. Li ser nerazîbûna rêxistinên civakî yên sivîl, Frontex a ku bi kontrolkirina sînorên derve yên Yekitiya Ewropayê berpirsyar e, di sibeha duşemê de ragihand ku dê balafireke xwe ji bo lêgerînê rake.
Li gorî Frontexê, keştiya ku qala wê tê kirin yek ji çar keştiyan e ku di rojên în û şemiyê de hatine tespîtkirin. Frontexê ragihand ku di vê mijarê de wan agahî dan rayedarên Îtalya, Malta, Lîbya û Tûnisê.
Rêxistina civakî ya sivîl a alman Sea-Watch beriya niha destnîşan kir ku tevî rayedar ji bûyerê agahdarin jî ji bo alîkariyê neketin nava liv û tevgerê. Rêxistina civakî ya sivîl di roja şemiyê de hişyar kiribû ku boteke lastîkî di rewşeke tengav de ye û di botê de 260 koçber hene.
Rayedarên Malta û yekîneyên ewlekariya peravî yên Îtalyayê têkildarî mijarê heta niha tu daxuyanî nedane. Komîseriya Bilind a Penaberan a Neteweyên Yekbûyî (UNHCR) û Rêxistina Koçê ya Navneteweyî jî fikarên xwe anîn ziman.
