Girtiyên li Girtîgeha Tîpa M a Êlihê li dijî qanûna înfazê ya cihêkar, di 4’ê nîsanê de îsyan kiribûn. Li ser vê yekê polîs, leşker û gardiyanan bi hovane êrîşî girtiyan kir û 439 girtî bi îşkenceyê veguhestibûn Girtîgeha Tîpa T a Amedê.
Serdozgeriya Komarê ya Êlihê têkildarî girtiyan dest bi lêpirsînê kir. Heta niha îfadeya 220 girtiyan, li girtîgeha ku lê ne bi rêya SEGBÎS’ê hate girtin. Di lêpirsîna dozgeriyê de her wiha biryara nepenîtiyê hate dayin.
Li gorî îdiayên di lêpirsînê de navên girtiyên ku dest bi îsyanê kirin wihane: “Ahmet Solmaz, Abbas Ayiş, Îdrîs Ayiş, Halîl Îbrahîm Oguzhan, Orhan Çelîk, Adnan Ekmen, Edîp Gol, Selman Omgan, Kasim Kasimoglu, Mesût Eme, Rasîm Kasimoglu, Abdurrahman Gorkem, Azad Îrge, Eşref Çîftçî, Ugur Cengîz, Nûrettîn Gultekîn, Mehmet Taymûr, Vedat Taymûr, Recep Kaplar, Ugur Ay, Bariş Uner, Bariş Ay, Veysel Gulsever, Rûstem Taşar, Ahmet Çelîk, Yûsûf Alar û Nebî Ozer.”
Têkildarî 220 girtiyên sewqî 1’emîn Dadgeha Ceza ya Sûlhê ya Êlihê hatin kirin, bi îdiayên ‘Zirar dane malê cemaweriyê’, ‘Ji bo îsyana girtî û hikûmxwaran serî hildane’ û ‘Nehiştine wezîfe bê kirin’ biryara girtinê hate dayin.
Tê gotin ku hejmara kesên ku têkildarî wan biryara girtinê hatiye dayin dibe ku zêdetir bibe. ÊLIH
