Wargeha Penaberan a Şehîd Rûstem Cûdî (Mexmûr) gelek caran rastî êrîşên dewleta tirk tên. Herî dawî jî di 15’ê nîsanê de balafirên bêmirov ên dewleta tirk şêniyên li wargehê hedef girtin û di encamê de 3 jinan jiyana xwe ji dest dan û jinek jî birîndar bû. Li wargehê 12 hezar kes dijîn û jiyana wan ji ber êrîşên dewleta tirk di xetereyê de ye. Têkildarî mijarê hevseroka Partiya Yekitiya Demokratîk (PYD) Eyşe Hiso ji ANHA’yê bi Ehmed Semîr û Lîlav Mihemed re axivî.
Eyşe Hiso anî ziman ku vîrûsa koronayê (Covîd-19) li ser jiyana hemû mirovahiyê xetereyeke mezin çê dike û tevî vê rewşê jî dewleta tirk dev ji êrîşên xwe yên li dijî gelê kurd narewestîne. Hiso bi domdarî wiha got: “Di dema ku cîhan ji ber vîrûsê tevdîran digire de dewleta tirk wargeha penaberan bombebaran dike. Ev şerm e û ji bo tevahiya dewletên cîhanê jî rûreşî ye. Di vê rewşê de jî faşîzma tirk faşîzma xwe aşkera dike û êrîşî herêm û bajarên kurdan dike.”
‘Tevî bangawaziyên agirbestê jî êrîşên xwe didomîne’
Di berdewamê de jî Hiso bal kişand ser bangawaziyên Neteweyên Yekbûyî (NY) û hêzên navneteweyî yên ji bo ragihandina agirbesteke cîhanî û wiha dirêjî da axaftina xwe: “Tevî vê jî dewleta tirk li aliyekê êrîşên xwe yên hovane li dijî herêmên Bakur û Rojhilatê Sûriyeyê didomîne, li aliyê din jî di 15’ê nîsanê de bi balafiran êrîşî wargeha Mexmûrê kir. Ji xwe ev bi mehane Mexmûr di nava ambargoyeke giran de ye û rewşa wê xetere ye.”
‘Dixwazin planên xwe yên dagirkeriyê pêk bînin’
Hiso bang li PDK’ê û rêveberiya Başûr kir ku dorpêça li ser wargehê rakin û wiha pê de çû: “Divê li dijî êrîşên dewleta tirk bêdeng nemînin. Êrîşa li dijî wargehê, êrîşeke hovane ye. Ev êrîş nîşan dide ku faşîzma dewleta tirk û komkujiyên wê yên li dijî gelê kurd didomin. NY û hêzên cîhanî berpirsên vê êrîşê ne. Dewleta tirk mijûlbûna cîhanî ya li dijî vîrûsê ji bo êrîşên li dijî gelê kurd weke firsend dibîne. Dixwazin plan û projeyên xwe yên dagirkeriyê pêk bînin.”
Bang li hikûmeta Iraqê kir
Herî dawî jî Eyşe Hiso ev tişt destnîşan kir: “Ez bang li aliyên têkildarî dosyaya Sûriyeyê û herêma Kurdistanê dikim ku li hemberî êrîşên dewleta tirk bêdeng nemînin. Divê rêxistinên navdewletî zextê li dewleta tirk bikin. Helwesta hikûmeta Iraqê ya li dijî êrîşê têrê nake. Hikumetên Iraqê û ya herêma Kurdistanê berpirsên êrîşên dewleta tirk in. Ez bang li hikûmeta Iraqê dikim ku qada hewayî li firîna balafirên dewleta tirk bigirin.” QAMIŞLO
