Navenda Nûçeyan |
Girtiyê bi navê Mahmût Temel li Girtîgeha Tîpa E ya Sêrtê dimîne. Temel li ser telefonê bi malbata xwe re axivî û binpêkirinên li girtîgehê parve kirin. Der barê mijarê de xwişka Temel, Kurmî Alagaş axivî û da zanîn ku birayê wê di nava du heftiyan de du caran spazma dil pê re çêbûye.
Temel bi rêya xwişka xwe ev agahî dan: “Tevî xetereya vîrûsa koronayê (Covîd-19) jî li girtîgehan tu tevdîr nehatine girtin. Roj bi roj mafên girtiyan bêhtir tên binpêkirin. Du hefte berê li girtîgehan du caran spazma dil bi min re çêbû. Ez carekê birim nexweşxaneyê. Niha baş im. Ava vexwarinê kêm e. Ava germ nadin. Ji bo vîrûsê tevdîr nehatine girtin. Alavên hîjyen û paqijiyê jî nadin. Em dixwazin bi pereyên xwe bikirîn lê vê jî qebûl nakin. Li girtîgehê tu xebata dezenfektanê nayê kirin. Ji ber ku em van binpêkirinan dibêjin, li me cezayê disiplînê û hucreyê dibirin. Em ê li dijî vê îtîraz bikin. Ne me dibin nexweşxaneyê û ne jî bijîşkan tînin vir. Li qawîşê em 13 kes dimînin. Em bi mirinê re rû bi rû hiştine.”
Kumrî Alagaş jî destnîşan kir ku ji ber şertên giran ên nexweşaneyê, 4 sal beriya niha nexweşiya dil bi birayê wê re çêbûye û wiha bi dawî kir: “Niha jî du caran spazma dil pê re çêbûye. Li ser vê agahiyê em li girtîgehê geriyan lê rayedarên girtîgehê îdia kirin ku tiştekî wiha nebûye. Em dixwazin demildest hemû girtiyên siyasî bên berdan.”
