19ê kanûna 2017î de Goristanê Garzanî yê Oleka Jor ra 282 cenazayê gerîlayanê PKKyî ameybî vetene û seba testê DNA erşawîyaybî Dezgehê Tipê Edlîyî yê Îstanbulî (ATK). Dima ke keyeyan ra nûmuneyê DNA ameybî girewtene nê cenazayî Goristanê Bêkesan ê Kîlyosî de ameybî definkerdene. Heta nika têna 18 cenazayî keyeyanê înan rê ameyî teslîmkerdene.
Nê cenazayan ra yew zî cenazaya Nadîre Elma (Nalin) a ke serra 1992î de tewra PKKyî bîye û 1ê êlula 2007î de zî şehîd bîye. Cenazaya Naline 13ê kanûne de keyeyê ci rê teslîm bîye û dewa aye ya Marine ya qezaya Nisêbînî ya Mêrdînî de ameye definkerdene.
Adnan Elmayî birayê Naline yo û tewr a nêdîye. Elmayî waka xo ra wina behs kerd: ”Waka mi tedaya dewlete ra tewra PKKyî bîye. Wexto ke waka mi şehîd bîye ma nêzanayêne ke cenazaya aye ça de ya la ma şînê ci kerd. 3-4î serî verê cû ma pê hesîyayî ke cenazaya aye Goristanê Garzanî de ya.”
Serranê peyênan de gorê PKKyî yenê texrîbkerdene û pê teyarayan dîyenê bombayan ver. Elmayî derheqê babete de vat: ”Dinya de çîyêko winasên çin o. Wijdanê kamî rê yeno ke wina bikero?”
Keyeyê Elmayî wextêkî ra dima pê hesîyayê ke cenazaya waka ci Goristanê Kîlyosî de ya. Elmayî vat: ”Eke şima biewnê definkerdişê înan şima vînenê ke zerrîya înan de merdimîye çin a. Cenazayî kerdî zereyê kutuyan ê qijkekan û pêro kutuyê pêser zereyê gorêkî de yê. Kutuyî şikîyayî û tede awa varanî estbî. Raşt a zî halêko xirab bi. Ma dima cenazaya xo berde Mêrdîn û defin kerde.”
Elmayî venga keyeyanê bînan da û vat: ”Wa keyeyê bêrê, cenazayanê xo berê. Wa nêtersê.” MÊRDÎN
