Vîrusê Korona (Covid-19) ke bajarê Çînî Wuhanî de vejîya raşte heme hema vilayê pêroyê dinya bî. Dinya de xeylê welatî vera no janî de têkoşîn danî ke tu dermanêk ci hema nêameyo vînayene û janêko bêderman o. Vîrus Tirkîya zî girewt binê tesîrê xo her ke şona bîlanço giran bena. Parlamentera Partîya Demokratîke ya Şaran (HDP) ya Mêrînî Pero Dundare derheqê babete de qisey kerde û dîyar kerde ke ganî Îmrali zî tede heme zîndanî bêrî vengkerdene
Pero Dundare destpêkê qiseykerdişê xo de bale ante tecrîdo ke 21 serrî yo Îmrali de dewam keno ser û wina va: “Abdullah Ocalan parêznameyanê xo de timî ca dano prosesî ser. Dewlete timî bi tecrîdkerdişan hewl dana ke vernîya nê fikran bigîra.”
‘Şerê ekolojîk û ekonomî, şerê tewr girdan ra yî’
Pero dewamê qiseykerdişê xo de qala şerê ekolojîk û ekonomîye kerde û wina domnaye: “Birêz Ocalan hetê ekonomî, îdeolojî, sîyasî û bîyolojîkî yê şerî rona raşte û hema zî roneno. Ma vînenê ke şerê 3. yê dinya bi vîrusî ameyo fehmkerdene. Ganî hêrişê DAIŞî sey destpêkê vîrusî bêrî ercnayene. Birêz Ocalan nameyê na rewşe ronabî û bi desan reyna vat ke do gamêko winasî bibo. Birêz Ocalan tehlukeyêko winasî verê de vîna û waşt ke tedbîrî bêrî girewtene. Dewlete timî bi polîtîkayanê tecrîdkerdişî komel xo rê kerde qurban û tewr tewir îmkanan xebetnaye.”
‘Hukmat hewl dano ke krîz açarno îmkan’
Pero ard ziwan ke ‘Hukmat hewl dano ke krîz açarno îmkan’ û qiseykerdişê xo domnaye: “Îqtîdar prosesê vîrusî de zî herinda ke çareserî bivîno komel reyde meşgul beno. Îqtîdar na rewşe açarneno îmkan û wazeno emrê xo derg bikero. Hukmat prosesêko winasî de hewl dano ke krîz açarno îmkan.”
‘Ganî zîndanî bêrî vengkerdene’
Parlamentera HDPyî ya Mêrdînî Pero tewr peynî dîyar kerde ke ganî heme zîndanî bêrî vengkerdene û wina va: “Cayanê tewr rîskan ra yew zî Îmrali yo. Ganî şert û mercê baş bêrî viraştene. Rayberê PKKyî Abdullah Ocalan bi desan reyan bale ant şer û janê ke kapîtalîzm ardo na rewşe ser o. Ganî Îmrali û zîndanê bînî bi lez bêrî vengkerdene û goş bidîyo vatişanê Ocalanî. Şikê zîndanna de vilabîyayîşê vîrusî esto. Ganî bi lez Birêz Ocalan û heme hepsîyî serbest bêrî veradayene.” MÊRDÎN
