Rêxistina HDPyî ya Dêrsimî xebatanê seba Kampanyaya Keyeyê Wayûbirayî dewam kena. Hemserekanê HDPyî ya Dêrsimî Nurşate Yeşîl û Îbrahîm Kasunî derheqê Kampanyaya Keyeyê Wayûbirayî de qisey kerd.
Hemsereke Nurşate Yeşîl vist vîrî ke merdimî hema zî neçare yê ke teber de bixebitê û tay kargehî zî rîyê janê vîrusê Korona ra qefilîyayî. Yeşîle da zanayene ke rewşa ekonomîke ya merdiman bena xirab û ê seba keyeyanê hewcedaran xebatan kenê, zaf zî muracat gênê.
Yeşîle venga pêro şarî da û vat: ”Wexto ke nê rojî vîyartî ma do poşman nêbê, ma tewrê kampanya bibê. Armancê kampanya madî ra zêdêr manewî yo. Bi nê hawayî dersimijê ke Ewropa de ciwîyenê erdê xo xo vîrî ra nêkerê. Belçîka, Avusturalya û heta Amerîka ra mesajî yenê. Wazenê hetkarîye bikerê. Na kampanya mabênê înan de pirdêk virazena. Kongreya Înşaya Dêrsimî zî waşt ke ma pîya têbigêrê.”
Hemserek Îbrahîm Kasunî zî eşkera kerd ke înan ê hemserek û rêxistinanê bînan reyde seferberîye daye destpêkerdene û vat: ”Qeza, dewan û merkezê şaristanî ra 700 keyeyan muracatê ma kerd. Xizanîyêka pîle esta. Ma 250 keyeyan rê keyeyê wayûbirayî dîyî. Şarê ma verî ra nata binê teda de yo. Tarîx û bawerîya ma de heqê wayûbiratîye esto. Ma nêverdenê cîranê ma vêşan bibo. Ma hetkarîya ci kenê. Coka ma venga her kesî danê ke tewrê kampanya bibo.” DÊRSIM
