Hetkarê Hemserekanê HDPyî û Wekîlê HDPyî yê Dêrsimî Alîcan Onluyî bale ante ferqê mabênê hûmara keyeyan ê paştdayoxan û keyeyanê hewcedaran ê Kampanyaya Keyeyê Wayûbirayî ser û îfade kerd ke xeylêk keyeyan rê hetkarî bêra kerdene û kesê ke îmkanê ci estê wa paştî bidê înan.
Onluyî destpêkê qiseykerdişê xo de va: “Pê na kampanya ma armanc kenê ke paştdayîşê komelî xurt bikerê û mekanîzmaya xopawitişê komelî awan bikerê. Ma 50 merkezê koordînasyonê krîzî awan kerdî ke rêxistinê ma yê dewe, qeza û şaristanan keyeyanê hewcedaran tesbît bikerê. Nê merkezê ma yê krîzî seba ke her di hetê kampanyaya keyeyê wayûbirayî bîyarê têkişt xebitîyenê. Tay keyeyan dest pê hetkarîya madîye kerd. Tay keyeyan zî hetkarîya kolîyê werdî kerde.”
Onluyî eşkera kerd ke heta nika înan 21 hezar û 759 keyeyî tesbît kerdî ke ganî înan rê paştî bêro dayene, înan malzemeyê pakîye resnayî 11 hezar û 16ê înan, 4 hezar û 212 keyeyan rê zî keyeyê wayûbirayî ame dîyene.
Alîcan Onluyî bale ante ferqê mabênê hûmara keyeyan ê paştdayoxan û keyeyanê hewcedaran ê Kampanyaya Keyeyê Wayûbirayî ser û vat: “Ma xîret kenê ke no ferq nêmano. Ma têna wexto ke wayîrê yewbînan bivejîyê û paştî bidê yewbînan pê wayûbiratî eşkenê heqê nê rojan ê giranan ra bêrê.” ANQARA
