Federasyonê Komeleyanê Dêrsimî (DEDEF) semedê vîrardişê kesê ke bi qerarê 4 Gulana 1937î de ‘Qerarnameyê Hereketê Tenkîlî yê Tuncelîveng’ 83 serrî verê ameybî qetilkerdene, eşkerayî da. DEDEF dîyar kerd ke ê emserr Vîrusê Korona vera nêeşkenî programanê girseyî virazî. Federasyon veng da heme dêrsimijan û waşt ke wa her kes seba vîrardişê kesanê ke 83 serrî verê Qetlîyamê 38an de ameyî kiştene keyeyanê xo de findan tafîno.
DEDEF eşkerayîya xo de ard ziwan ke şarê herême bi plankerde û bi sîstem ameyî qetilkerdene û wina va: “Goreyê dayeyanê fermî 16 hezar merdimî ameyî qetilkerdene. Reyna goreyê dayeyanê nefermî 70 hezar merdimî ameyî qetilkerdene. Bi deshezaran merdimî ca û wareyanê xo ra ameyî koçkerdene û surgun bîyî. Semedê şarê Dêrsimî 4ê Gulane Roja Sîya ya. Ma do 4ê Gulane de seba merdimanê ke Terteleyê Dêrsimî yê 37-38an de ameyî qetilkerdene duayan bikerî û înan vîr bîyarî. Ma seba vîradişê înan keyeyanê xo de findan tafînî. Ma wazenê ke serê medyaya komelkî de zî programanê renginan virazî. Ma wazenê ke serê cografyaya xo de ziwan, kultur û kamîya xo azad bicuyî. Ma wazenê ke 4ê Gulane sey roja ‘Terteleyê Dêrsimê 37-38î’ bêra qebûlkerdene. Ma wazenê ke arvîşî bêrî akerdene û hesabê înan bêro dayene.” DÊRSÎM
