17ê temmuza 2019î ra nata Partîya Demokratîke a Kurdistanî (PDK) Kampa Multecîyan a Mexmûrî girewt binê ambargoyî ke bi hezaran kesî tede yê. Hêzê Çekin yê Artêşa Tirkî (TSK) 15ê Nîsane de Kampe bombardûman kerdî. Bombardûman de 3 cinîyî cuya xo vindî kerdbî. Parlementera Partîya Demokratîke a Şaran (HDP) ya Edene Tulay Hatîmogullariye derheqê ambargoya PDKyî ya serê Mexmûrî, hêrişanê hewayî yê dewleta tirkî û polîtîkayê şerî yê AKPyî de qisey kerde.
‘Sîvîl yenî hedefgirewtene’
Hatîmogullariye destpêkê qiseykerdişê xo de daye zanayene ke prosesêk ke weşîya merdimîye tehluke de ya û pêroyê welat hemverê vîrusî de têkoşîn dano de, AKP û MHP stratejîyê xo yê şerî de gamêk tepîya nêancenî û şer hîna xorî kenî. Hatîmogullariye dewamê qiseykerdişê xo de wina va: “Lîbya de hemverê hêzê Serracî de raşte raşt ê bi xo şer kerdî û ancîyayî. Dima ra ame vînayene ke serçeteyê nê operasyonan leşkerê tirk û kadroyê Teşkîlatê Îstîxbarato Mîllî yê Tirkî yî. Sewbîna ma xeberanê Îdlîbî ke dem bi dem pêrodayîş virazîyeno, eşnawenî. Îqtîdar taybetî verê xo dano Iraq. Ma hêrişê vera Kampa Multecîyan a Mexmûrî qebul nêkenî. Ma şermizar kenî. Tirkîya qetilkerdişê 3 cinîyan de dişmenîya xo ya vera kurdan reyna eşkera kerde.”
‘Wezîfeyê PDKyî paştîdayîşê yewîya neteweyî yo’
Hatîmogullariye dewamê qiseykerdişê xo de dîyar kerde ke PDK Kurdistan de nuqtayanê neweyan de leşkeranê xo bi ca kerdo û goreyê ma peynîya no de Tîfaqê Cumhur û Ergenekon esto û wina dewam kerde: “Tîya de rolê DYAye zaf gird o. Ganî nê heme çîyî pîya bêrî ercnayene. Rol PDKyî nîyo qebulkerdene. Wezîfeyê PDKyî oyo ke paştî bido yewîya neteweyî yo û hessas têbigêro.”
‘Gamê şerî yê AKPyî yenî vînayene’
Hatîmogullariye qiseykerdişê xo yê peyênan de qala sewqîyatan kerde û nê çîyan arde ziwan: “Goreyê nê têgêrayîşan wina asîyeno ke do rojanê verênan de hereketêko gird bêro vînayene. Babetanê krîtîkan ra yew zî oyo ke Cerablusî ra guzergahê Dîlok û Rihayî yenî bikarardene. Seba herêmanê Girê Sipî û Serêkanîyê zî xeylê kesî Tirkîya ra berdî ewja. AKP nê rojanê Vîrusê Korona de seba bedilnayîşê demografîya Bakur û Rojhelatê Sûrîye, gaman erzena.”
‘Paştîdayîşê şaran şert o’
Hatîmogullariye tewr peynî veng daye AKPyî ke bilez fek polîtîkayanê şerî ra vera bido û va: “Ma baş zanî ke rejîmê yew kesî şerî ra miqate beno. Ma veng danî şaran. Paştîdayîşê şaran şert o.” EDENE
