Rêxistina HDPyî ya Dêrsimî derheqê astengkerdişê endamanê meclîsê şaredarîye û tewirê şaredarîye yê vera înan de eşkerayîyêke daye û nê pare kerdî:
”Verê cû Wekîlê HDPyî yê Dêrsimî Alîşan Onluyî pêşnîyaz kerdbi ke Dêrsim de vera Vîrusê Korona pê tewrbîyayîşê pêro partîyanê Meclîsê Şaredarîye masayêka krîzî bêra awankerdene. Şaredarîya Dêrsimî seba nê pêşnîyazî îfade kerd ke şaredarîye eşkena têna walîtîye reyde hetkarîye bikera, seba hetkarîye partîyan û dezgehanê sivîlan rê destûr nêno dayene. La dima Şaredarîya Dêrsimî Grûba Komelkî ya Vefa ya ke terefgîra AKPyî ya reyde karê hetkarîye yo hempar da destpêkerdene û Meclîsê Şaredarîye reyde têkilîye nêviraşte. Ganî şaredarîye derheqê dezgehan de ke pîya kar kena baldar biba. Rixmo ke ma çend ard ziwan ke ganî pêro dezgehê Dêrsimî rayberîya şaredarîye de pîya têbigêrê û paştdayîşê bêro xurtkerdene zî şaredarîye îfade kerd ke partîya ma pêşnîyazêko musbet nêkerd. Na nêheqî ya. Şaredarîya keyepelê xo ser o pare kerdbi ke ganî endamê ma yê meclîsê şaredarîye zî tewrê karê hemparî yê şaredarî û Vefa bibê. La mumkîn nîyo ke endamê ma tewrê dezgehêkê terefgîranê îqtîdarî bibê ke îqtîdar bi hawayêkê barbarî hêrişê ma keno.
Ganî ma şarê xo reyde pare bikerê ke:
* HDPyî verî ke Kampanyaya Keyeyê Wayûbirayî dîyaye destpêkerdene, Meclîsê Munzur Ozgur Aksinî rê pêşnîyaz kerd ke şaredarîya Dêrsimî de komîteyêka hetkarîye bêra ronayene.
* Pêşnîyaz de ma îfade kerd ke ganî rêxistinê komelê sivîlî û temsîlkarê dezgehan zî komîte de ca bigêrê.
* La Şaredarîya Dêrsimî seba na xebata kolektîfe îmkan nêviraşt û Grûba Paştdayîşê Komelkî ya Vefa reyde xebatêke daye destpêkerdene.
* Şaredarîye bi nê hawayî fikrê endamanê Meclîsê Şaredarîye nêgirewtî
* Şaredarîya ma heyf ke bêtesdîqê Meclîsê Şaredarîye Grûba Paştdayîşê Komelkî ya Vefa ya terefgîra AKPyî reyde ca girewt.” DÊRSIM
