Navenda Nûçeyan |
Hate ragihandin di encama bombebaranên balafirên dewleta Tirk yên îro de, li Xakûrkê du ciwanên xelkê bajarê Şino yê Rojhilatê Kurdistanê jiyana xwe ji destdan.
Malpera Rêxistina Mafên Mirovan a Hengaw di nûçeyekê de ragihand ku artêşa tirk di saetên serê sibehê de devera Xakurkê bombebaran kir. Rêxistinê da zanîn ku di encama bombebaranê de 2 ciwanên ku xelkê bajarê Şino yê rojhilatê Kurdistanê bûn, jiyana xwe ji dest dan.
Li gorî nûçeya rêxistinê navê ciwanan wiha ne: “Faxir Tazeward (35) û Reşîd Mîroyî (36).” Hat ragihandin ku her du ciwan jî ji bo berhevkirina pincar çûbûn herêmê. Hate destnîşankirin ji ber asêbûna deverê hîna malbatan xwe negihandiye cenazeyan û cenaze hê jî li zozanên Xakurkê ne.
Hêjayî gotinê ye ku herêma Xakurkê devereke çiyayî ye û dikeve sêgoşeya sînorê bakur, rojhilat û başûrê Kurdistanê. Ji aliyê Rojhilat ve bajarê Şino, ji aliyê Başûr ve jî bajaroka Sîdekan cihên herî nêzî Xakurkê ne.
