Koordînasyona Krîzê ya Herêmê ya Covîd-19’ê têkildarî belavbûna vîrûsê li girtîgehan daxuyaniyek da.
Daxuyanî wiha ye:
“Wezîrê Edaletê Abdulhamît Gul diyar kir ku li çar girtîgehên cuda 120 girtî û hikûmxwar bi vîrûsa koronayê ketine. Her wiha Serdozgerê Komarê yê Konyayê Ramazan Solmaz jî diyar kir ku li Girtîgeha Tîpa E ya Konyayê piştî ku nîşaneya vîrûsê li ser hikûmxwarekî re hate dîtin, li qawîşên pê ve têkildar test hate kirin û aşkera bû ku 55 hikûmxwar û girtî bi vîrûsa koronayê ketine.
Ev hemû nîşaneyên metirsiyê ne. Belavbûna vîrûsê li girtîgehekê tenê li nava 55 mirovî rewşeke ji rêzê nîne. Li gorî agahiyên malbatan, li dehan girtîgehan nîşenayên şewbê hene. Bi hezaran nexweş ji tirsa şewbê neçar dimînin ku tedawiya xwe taloq bikin. Nexweş ji tirsa şewbê nikarin biçin nexweşxaneyan. Ev yek bi tena serê xwe nîşan dide ku girtî terkî mirinê hatine kirin.
Tevdîra bingehîn a li dijî şewbê ew e ku mirov xwe ji hev dûr bigirin. Lê belê li girtîgehan ji kapasîteya heyî 3 qat zêdetir girtî li cihekî tên girtin. Piraniya van mirovan jî bi rengekî derhiquqî tên girtin. Mirina mirovên bêguneh li girtîgehên dewletê di berpirsyariya dewletê de ye.
Şewb dike ku mirov pê bimirin û divê bi awayeke lezgîn tevdîrên rasteqîn, wekhev û lezgîn bên girtin. Di vê çarçoyê de;
* Girtiyên extiyar û nexweş divê demildest bên berdan. Ya exlaqî, mirovî û hiqûqî ev e.
* Heyeteke ku MED TUHAD-FED, ÎHD, TTB, TBB jî di nav de divê bikare li girtîgehan bigere û girtîgehan kontrol bike.
* Divê bêyî îstîsna li hemû girtîgehan testa koronayê bê kirin û encamên wê bi raya giştî re bên parvekirin.” AMED
