Navenda Ragihandin û Çapemeniyê ya HPG’ê bi daxuyaniyekê ragihand ku hêzên wan ên HPG û YJA Starê li Gabarê li dijî hêzên artêşa tirk çalakiyeke bi bandor pêk anîne.
HPG’ê diyar kir ku hêzên wan di çarçoveya Pêngava Tolhildanê ya Şehîd Medya Mawa û Şehîd Rizgar Gever de di navbera qada Dêrgulê û qereqola Girê Cotyar a Gabarê ya li Şirnexê wesayîteke zirxî ya Kobra şopandiye û di 27’ê nîsanê saet di 12.00’an de li dijî vê wesayîtê çalakî li dar xistiye. HPG’ê da zanîn ku hêzên wan ji nêz ve li vê wesayîtê dane û wesayît hatiye îmhakirin. Bi domdarî jî HPG’ê ev agahî dan: “Ev wesayît îmha bûye û 5 leşkerên di nav wesayîtê de jî mirine. Piştî çalakiyê bi helîkopterên Skorsky leşkerên mirî ji qada çalakiyê hatine derxistin. Yekîneya me ya ku ev çalakî li dar xistine, bi silametî vegeriyane baregehên xwe.”
Derbarê bombebaranên artêşa tirk de jî HPG’ê ev agahî parve kirin: “Di 30’ê nîsanê (îro) saet di 02.30’an de balafirên şer ên artêşa tirk a dagirker qada Saca ya Zapê ya li Herêmên Parastinê yên Medyayê bombebaran kir. Di 29’ê nîsanê saet di 23.00’an de balafirên şer qada Gundê Mêlê ya Zapê bombebaran kir. Di van bombebaran de tiştek bi hêzên me nehatiye.” BEHDÎNAN
