Zihnîyetê şaristanîye ke zirarêko gird danî xozayî Vîrusê Korona (Covid-19) reyde bi hawayêko eşkera vejîya raşte ke çiqas tehlukeyin o. Roja ma ya ewro de bi hezaran cinîyî hema zî têkilîya xo xozayî reyde nêbirnayî. Her çiqas ke dewan ra koçê bajaran bêro kerdene zî cinîyî kulturê xo vîra nêkerdî û domnenî. Cinîyî botanijî menganê wisarî de vejîyenî zozanan û xeylê nebatanê cîya-cîyayan arê danî. Nê nebatanê ke zozanan de zergun benî ra yew zî kereng a.
Zafaneyê cinîyê Xaçortî yê ke Wan de cuyenî, koçê dewanê Elkê ya Şirnexi kerdî. Cinîyê ke serranê 90an de zextê dewlete vera mecburî koç kerdî, nika şonî zozananê Feraşînî û kerengan arê danî. Cinîyî nê kerenganê ke arê danî bi tewirê cîya-cîyayan nimnenî û menganê zimistanî de wenî.
Kerenge bi vilika xo ya more, herêmanê koyî de yena vînayena. Xeylê cayan de zergun bena, la tewr zêde na herême de yena werdene.
‘Ma dewan ra nêbirîyenî’
Derheqê babete de cinîyan ra Naciye Abîya ke kerenga sey ameyîşê wisarî bi name kena qisey kerde û wina va: “Ma dewan de bi nebatanê xozayî cuya xo vîyarnenî. Tîya de cuyêka xozayî esta. Cuya dewan zaf weş a. Ma bi ameyîşê wisarî şonî zozanan. Arêdayîşê kerengan tay zehmet o. Ma bi kardî kerengan binê erdî ra vejenî. Seba ke ma kerenge hes kenî, ma rê zexmet nîno.”
‘Hem weş a, hem zî seba weşîye baş a’
Cinîyan ra tewr peynî Bahar Abîye qisey kerde û aye zî nê çîyan ard ziwan: “Arêdayîşê kerengan karêko zehmet o. Ma kerengan arê danî û aşmanê zimistanî de pewjenî. Ma pake kenî, awe de pewjenî, dima ra kenî poşetan û dolaban de seba zimistanî nimnenî. Ma kerengan bi hakan pewjenî. Ma şorbeya kerengan virazenî. Hem weş a, hem zî seba weşîye baş a.” WAN
