Pêro dinya vera vîrusê Korona têkoşîn kena la îqtîdarê AKP-MHPyî vera goranê gerîlayanê HPG û YJA-Starî hêriş keno. Hewteyê vîyarteyî de Wan, Colemêrg Çewlîg û Amed de leşkeranê tirkan hêrişê goran kerd û gorê gerîlayan rijnayî. Rixmo ke rayaumûmîye vera nê hêrişan nêrazîbîyayîşê xo mojnena reyna zî hêrişî dewam kenê.
Hewteyê vîyarteyî de dewa Îbrahîman a pabesteyê merkezê Çewlîgî de leşkeranê tirkan gorê gerîlaya YJA-Starî Sevda Serînyela ke serra 2017î de şehîd bîye, rijna. Dadîya Sevda Hakîfe Serînyel derheqê babete de qisey kerd û îfade kerd ke a verê gorê kênaya xo de nobete de ya.
Dayîka Hakîfe wina qala serebûtî kerde: ” Leşkeran fotografê gorê kênaya mi girewto û şîyê. 14ê nîsane de înan lajê mi rê telefon kerd û vat ke ‘Bê îfade bide.’ Lajê mi zî şi qereqol. Dima ke lajê mi ame vat ke leşkerî wazenê ke ma kerraya gorê kênaya mi wedarê. Lajê mi qebul nêkerdo la înan israr kerdo. Leşkeran lajê mi rê vat ke ma nuşteyê gorî pakî bikerê nêbo ê do bikerê.”
Dayîka Hakîfe da zanayene ke înan fermanê qereqolî qebul nêkerd û leşkeran vera înan rê telefon kerd. Dima zî leşkeran gor şikna û nuşteyê ”Mercane” û ”Seba ke biciwîyê ma çend zaf merdî” cêra kerdî. Dayîka Hakîfe ard ziwan ke nika zî leşkeranê dewlete waşt ke ê fotografê Sevda wedarê. Dayîka Hakîfe vat: ”Ma ne fotograf wedarenê ne zî nuşte. A kênaya min a. Ma rê persenê ke kamî na kerraya gorî viraşta. Ma zî vat ma kerd. De vajê nê fotografî de çira esto? Çira wazenê ke ma wedarê? Fotografê kênaya min o û ez do ê nêwedarna.
Çira ma rê nê zulmî kenê? Her roje qereqolî rê telefon kenê. Ez zî heta şanî verê gorê kênaya xo de vindena ke wa çew zerar nêdo ci, nêrijno. Nika ma aşma Remezanî de yê. Kamyew dîn de no kerdiş dîyayo? Ma nê zulmî ke ma rê yeno kerdene qebul nêkenê. Wa pêro dinya vengê mi bieşnawa, ez do gorê kênaya xo bêwayîr nêverda. Pêro dinya ha bilîya vîrusê Korona ya la dewlete ha peyê goranê ma de ya. Goranê ma ra destê xo bigêrê.” ÇEWLÎG
