Navenda Nûçeyan |
Şaxa Komeleya Mafên Mirovan (ÎHD) a Îzmîrê binpêkirina mafan a li girtîgehan kire rapor. Diyar kir di 4 mehan de li dijî rûmeta mirovahiyê binpêkirin zêde bûne. ÎHD’ê her wiha got girtiyên ku testên wan pozîtîf derketine zêde bûne.
Şaxa Komeleya Mafên Mirovan (ÎHD) a Îzmîrê binpêkirinên di 4 mehên dawî yên li girtîgehan kire rapor. Rapor ji hêla rêveberê şaxê Bariş Işik ve hate xwendin. Işik destnîşan kir ku di van 4 mehên dawî de li girtîgehên tîpa F ên Buca û Kiriklarê, li Girtîgeha Girtî ya Jinan a Şakranê ya bi Tîpa T a Hejmar 1, 2, 3 û 4’an, Girtîgeha Girtî ya Zarokan a Îzmîrê, ya tîpa T a Odemîşê û ya tîpa R a Menemenê binpêkirinên mafan zêde bûne.
Işik daxuyand ku li van girtîgehên navborî girtiyên ku testên wan ên Covîd-19’ê pozîtîf derketin zêde bûne û li hêla din di çar mehên dawî de rêbazên zext û zordariyê û li dijî rûmeta mirovahiyê li van girtîgehan zêde bûne.
Bi domdarî jî Işik ev çend daxwaz wiha rêz kirin:
“*Serlêdan û gilî beriya ku bên sînorkirin divê bigihijin ber destê saziyên têkildar. Divê mekanîzmayên edlî û îdarî jî ji bo van serlêdan û giliyan lêpirsîneke çalak birêve bibe.
* Rêveberiyên girtîgehan jî divê der barê şertên fîzîkî û muameleya ku tê kirin kontroleke karîger a îdarî û darazî bike û mafê girtiyan ku bikaribin bi malbat û cîhanê re têkilî deynin asteng neke.
* Divê girtiyan bişînin deverên nêzî malbat û parêzerên wan.
* Sînordarkirinên li ser rojname, kovar, radyo, name, pirtûk û hwd. werin rakirin, astengiyên kêfî yên li ser hevdîtin, nivîsîn û parastina bi zimanê dayikê were rakirin.
* Dema ku li ser girtiyan tê sehkirin divê ev ne li dijî rûmeta mirovahiyê be.
* Divê cezayên disiplînê ne li dijî mafê mirovahiyê bin. Divê atmosfera îşkenceyê ya li ser girtiyan were rakirin û girtî bikaribin layiqî rûmeta mirovahiyê bijîn.
* Divê şandeyên neteweyî û navneteweyî bi rehetî bikaribin girtîgehan kontrol bikin.
* Em dixwazin ku personelên tibî û bijîşk perwerdehiya Protokola Stenbolê bistînin, tecrîda li ser girtiyan were rakirin, astengiyên li ser aktîvîteyên sosyal û çandî were rakirin.
* Di pêvajoya pandemiyê de divê guh bidin pêşniyarên Rêxistina Tendiristiyê ya Cîhanê (WHO).”
