Serranê 90an de xeylê dejî ameyî antene û bi taybetî xoverdayîşê dayîkan vîrê tu kesî ra nêşîyo. Nê dayîka ra yewe zî Ferha Yavuze (Dayîka Ferha) ya. Yavuze dewa Dengizî ya pabesteyê Stewrê ya Mêrdînî de cuyena û 80 serrî ya. Dayîka Ferha surgun zî tede xeylê çîyan reyde rî bi rî menda û lajê aye Doganî zî cuya xo vindî kerdo.
Şima kotî ra yenî, şima Doganî nêvînayo?
Dogan Yavuz tewrê PKKyî beno. Serra 1997î de pêrodayîşêk de sax keweno dest û qereqol de îşkence bi ci yeno kerdene. Doganî îşkence de xover dano. Coka ra Doganî kenî helîkopter û helîkopter ra erzenî war. Her çiqas ke hende serrî derbaz bibî zî cenazeya Doganî hema zî nêameya vînayene. Dayîka Ferha dehr û kederê lajê x ora vîrê xo vindî kena. Dayîka Ferha heme wesayîtê ke verê keyeyê aye ra derbaz benî vindarnena û înan rê persê ‘Şima kotî ra yenî, şima Doganî nêvînayo?’ pers kena. Her çiqas ke vîrê xo vindî bikera zî, tena lajê xo vîr nêkerda.
‘Dayîka mi nêameye serê hişê xo’
Cemîle Yavuze dîyar kerde ke dayîka aye badê birayê xo nêameya serê hişê xo û qiseykerdişê xo de wina va: “Dayîka mi badê birayê mi dejêk pîl ante û nêameya serê hişê xo. Dewa ma ameye veşênayene. Ma mecbur mendî ke koç bikerî. Dogan do qet vîrê dayîka mi ra nêşêro. Dayîka mi vîşêrê Doganî tu kesêkî nêşinasnena û ma zî nêşinasnena. La Dogan teq vîrê dayîka mi ra nêşî. Badê Doganî her kesî dana vindetene û înan rê Doganî pers kena.
‘Mi Doganî nêvînayo’
Cîrana înan Zekiye Alokmene zî derheqê dayîka Ferha de wina va: “4 domanê na dayîke bi hawayo cîya-cîyae cuya xo vindî kerdî. Dogan nezaret de îşkence vîna û helîkopter ra erzîya war. Dejê ci qet kêmî nêbî. Cenazeya Doganî hema zî nêameya vînayene. Her kesî rê ‘Şima Doganî nêvînayo?’ pers kena.” MÊRDÎN
