Îbrahîm Gokçekî roja 323. ya rojeyê mergî de mabên dabi çalakîya xo û 7ê gulane de nêweşxane de dinyaya xo bedilnaye. Cenazaya ci heman roje ameye ardene Cemxaneyê Gazî û polîsan verî ke cenaza bierşawîya Kayserî dormeyê taxa Gazî girewt. Dekewtişê cemxaneyî de tomayî ca bîyî û rayîrê hetê polîsan ra ameyî girewtene.
Komêke waşt ke erşawîyayîşê cenaza ra verî rayraşîyayîşêk bikerê. Polîsan dormeyê kome girewt. Komêka qijkeke û tay endamanê çapemenîye ra berî destûr nêame dayene ke çew debikewo Cemxane.
Polîsan waşt ke dekewtişê cemxaneyî de dadî û babîyê Gokçekî kontrolê GBTyî ra derbaz bikerê. Nê semedî ra zî wextêk alozîye qewimîyaye. Nêrazîbîyayîşan ra dima dadî û babîyê Gokçekî bê GBT dekewtî cemxane.
Koma ke cemxane de vindertêne tewirê polîsan pê slogan û marşan protesto kerd. Cemxane de rewşa alozîye dewam kena. STENBOL
