Navenda Nûçeyan |
Li Girtîgeha Tîpa T a Seydîşehîr a Konyayê şeş girtiyan 2 roj berê li dijî zext û îşkenceyê dest bi greva birçîbûnê ya bêdem-bêdorveger kiribûn. Têkildarî mijarê endamê Komeleya Hiqûqnasên Ji Bo Azadiyê (OHD) parêzer Abdurrahman Karabulut axivî û diyar kir ku hem li ser daxwaza komeleyê û hem jî ya malbatan, ew di 7’ê gulanê de çûn girtîgehê.
Karabulut da zanîn ku wan bi girti Ş.F., D.A., O.K., M.A., C.D., R.E. û Y.Û. ku di hucreyê de tên girtin û bi M.A. yê ji ber nexweşiyê rakirin revîre re hevdîtin kirine. Karabulut wiha domand: “Girtiyan hişyarî dan û gotin ku heke daxwazên wan neyên bersivandin, dê bikevin rojiya mirinê. Girtî û hikumxwar dixwazin ku dawî li serjimartina li ser pêyan bê û hevalên wan ên li hucreyan hatine belavkirin jinûve li qawîşan bên vegerandin. Di prensîbê de li dijî jimartinê nînin lê belê dixwazin jimartin bi rêbazeke li rûmeta mirovan tê bê kirin. Her wiha tev daxwazên xwe bi mehan e hem bi nivîskî hem jî bi devkî ji saziyên pêwendîdar re ragihandine lê heta niha bersiv jê re nehatiye dayîn. Ji ber vê jî dest bi çalakiyê kirine.”
Herî dawî jî Karabulut ev tişt anî ziman: “Di dema hevdîtinê de girtiyan hemûyan diyar kir ku ji ber ew li ber serjimartina li ser pêyan rabûne, gardiyanan li wan xistiye.”
