Dêrsimo ke tede întîhar, vindîbîyayîş, îstîsmaro cinsî û swb. zêde yo de, hedîseyêko bîn virazîya. Mudirê Marketê ŞOKî yê Dêrsimî Yaşar Koç xebatkarêka cinîye D.ye tacîz kerd û hetê cayê karî ra hewteyêk cezaya dûrîfînayîşî dîya ci. Badê hewteyêk ame zanayene ke no mudiro tacîzkar şûbeyê Çewlîgî de dest bi karî kerdo. Cînîya ke tacîzê mudirî teşhîr kerde D.ye veng daye pêroyê cinîyan û va: “Ez veng dana pêroyê cinîyan ke vera tacîz, tecawiz û qetilkerdişê cinîyan de bêvengîya xo xira bikerî.”
D.ye qiseykerdişê xo de va: “Badê ke mi muracatê karî kerde ê mi gêrayî û vatî ‘Ma do to hektara mudirî bikerî’. Ez 3ê adarî de girîyaya kar. Mi vîna ke şertê xebatî giran î. Herinda ke ez 8 saet bixebetîya de serê sibayî ra heta şewe mi dayî xebetnayene. Hema roja 2ine ê xebatê mi de Yaşar Koç rê vat ke ma seba hetkarîya mudirî qisey bikerî û israr kerd. Dima ra embazo ke mi rê bî referans mi gêra û va ‘Ma do siba seba hetkarîya mudirî qisey bikerî’. Roja bîn ez û Yaşar Koç ma şîyî kafeyê hemverê cayê karî. Wesayîr ramit hetê keye û embazo bîn gêra û va ‘Ma şonî keye. Ma hakan şiknenî û çay girnenî. Ti zî bê.’”
‘Badê tacîzî tehdît kerd’
D.ye dewamê qiseykerdişê xo de daye zanayene ke badê tacîzê fekkî raştê tacîzê fîzîkî ameya û wina domnaye: “Badê ke mi pawitişê xo yê meşru xebetna, Yaşar Koç mi rê va ‘Nêbo nêbo maben meke mabenê mi û xo. Ya nê do xirab bibo’ û mi tehdît kerd. Dima ra zî mi rê va ‘Mi to cerebra. Ez cinîya xo ra zaf hes kena. Kesêk rê mevaje’ û xo pake nîşan da.”
‘Rojêk nezaret de mend û dima ra serbest vera dîya’
D.ye tewr peynî wina va: “Hedîse ra dima ez berpirsîyarê herême yê magazayî gêraya. Berpirsîyar vat ke hedîse ma eleqedar nêkeno û Yaşar Koç do gure ra bêro vetene. Yaşar Koç hewteyêk gure ra ame dûrîfînayene. No kes verê cû zî bi mesajan kesêk tacîz kerdo. Bado ke hedîse çaepemenî de ca girewt, berpirsîyarê herêmn waştî ke reyma mi reyde qisey bikerî, la mi nêwaşte. Mi gerreyê Koçî kerde. Rojêk nezaret de mend û dima ra serbest vera dîya.
‘Polîtîkayê dişmenîya vera cinîyan teşwîqê tacîz û tecawizî kenî’
D.ye qiseykerdişê xo yê peyênan de veng daye pêroyê cinîyan û wina va: “Beno ke ŞOK Yaşar Koçî gure ra bivejo. No netîceyê teşhîranê ma yo. Tîya de amacê ma oyo ke ma bibî vengê cinîyanê ke komel vera xo sey sucdar hîs kenî bibî. Ganî ma vera hedîseyanê winasîyan de bêveng nêmanî. Ganî ma nê kesê ke wina kenî şerm bikerî. Teşhîrkerdiş parçeyê têkoşînê ma yo. Dewlete bi polîtîkayanê xo yê dişmenîya vera cinîyan teşwîqê tacîz û tecawizî kena. Ez veng dana pêroyê cinîyan ke vera tacîz, tecawiz û qetilkerdişê cinîyan de bêvengîya xo xira bikerî.” DÊRSIM
