Merkezê Xeberan]
Rejîmê Baasî serra 1974î de şerê xo yê hemverê şarê kurdan xorî keno. Keyeyê kurdî Bexda ra vejeno. Rejîmê Baasî bajarê Qeladizî bombardûman keno. Xeylê kurdî netîceyê bombardûmanan de cuya xo vindî kenî. Leyla Qasime seba ke bale bianca qetlîyamanê hemverê şarê kurdî ser o, teyareyêk remnena û 24ê nîsana 1974î de yena tepiştene. Leyla Qasime îşkenceyê giranan vînena. Leyla Qasim û 4 ambazê aye bi qerarê Sedam Hisênî 12ê gulana 1974î de yenî daliqnayene.
Ewro serrgêra 46. yê qetilkerdişê nê embazan o. Cinîya kurde Leyla Qasime serra 1952î de dewa Bamîlî ya Xaneqînî de yena dinya. Qasime keyeyê xo de cinîya tena bîye. Serewedartox û zerrî ra bîye. Pîyê Leyla citkarî kerdêne. Leyla mektebo binameyê Wend wenena û serkewte bîye. Leyla domanîya xo de xeylê aktîf bîye. Her çiqas ke keyeyê Leyla feqîr bibo zî pîyê Leyla waştêne ke Leyla biwana. Badê mektebo seretayî keyeyê Leyla 1958î de feqîrî ra koçê Bexda keno. Leyla ewja de mektebê xo domnana û beşê Komelnasî yê Unîversîte qezenc kena. Wexto le Leyla 20 serrî bîye, Yewîya Xoverdayoxanê Kurdan şinasnena û meqaleyêk nusena. Meqaleyê xo de qala dişmenîya Sedam Hisênî yê hemverê kurdan kena û coka yena hedefgirewtene.
Her çiqas ke Iraq de zextê îstixbaratê Baasî zêde bibo zî, serra 1972î de mîyanê bajarê Bexda de têgêrayîş û têkoşînê Yewîya Xoverdayoxanê Kurdistanî zêde beno. Nê serran de zafaneyê hêz û şoreşê kurdan binê rayîrberîya PDKyî de koyanê başûrê Kurdistanî û herêmanê azadan de kom benî. Seba ke Leyla Qasime vînena her kes vano; kurd tena eşkenî dew û koyan de sere wedarnî, cinî nêeşkena tewrê gureyê camêrdan û xebatê şoreşgerî biba, qerar dana ke hîna aktîf tewrê wendekaranê ciwanan biba û xebatanê kurdwerîye bajarê Iraq û taybetî zî Bexda de zêde bikera.
Tewrê 4 embazanê xo ameye tepiştene
24ê nîsana 1974î de Leyla Qasime tewrê 4 embazê xo yê bi nameyê; Cewad Hemewendî, Nerîman Fuad Mestî, Hesen Hemereşîd û Azad Silêman Mîranî netîceyê operasyonêk teyaregeh ê hêzê rejîmê Baasî de Bexda de yenî tepiştene. Leyla Qasime îşkenceyê giranan vînena, la îstixbaran nêeşkeno tu cekuyêk fekê aye ra bivejno.
‘Ez xeylê kêweş û sereberza ke ez do xo fedayê xelisnayîşê Kurdistanî bikera’
Leyla Qasime cinîyêka têkoşer û cesaret bîye. Wexto ke îstixbaratê Baasî îfadeyê Leyla Qasime gêno, Leyla Qasime înan rê vana: “Mi bikişêne, la bizanêne ke kiştişê mi do bi hezaran kurdan hewne ra şîyar bikero. Ez xeylê kêweş û sereberza ke ez do xo fedayê xelisnayîşê Kurdistanî bikera.”
Rejîmê Baasî seba tersnayîşê ciwanan, hema tepiştişê Leyla Qasim û embazanê aye ra 2 hewte derbaz nêbîbî, înan bi qerarê mehkemeyêka nêadil daliqneno. Leyla Qasim û embazê aye 12ê gulana 1974î de ameyî daliqnayene.
Badê daliqnayîşê Leyla Qasime û embazê aye hema demêk zêde derbaz nêbîbî, birayê Leyla yê bi nameyê Selamî Bexda de bi mehneya fotografê waya xo Leyleye vila kerdo, hetê rejîmê Baasî ra ame qetilkerdene.
Rojêk verê qetilkerdişê Leyla Qasime
Rejîmê Baasî rojêk verê qetilkerdişê Leyla Qasime destûr dano ke dadî û waya Leyla zîndan de aye bivînî. Pêvînayîşê dadî û waye de Leyla vana: “Meqes û destê kincanê mi yê kurdî vîra mekerêne.” Waya Leyla bi şaşmende vana meqeso çi? Leyla vana: “Girzeyêk porê mi bibirnê û hetê xo de binimnê. Wexto ke Kurdistan azad bî, porê mi bi hewayo azad ê Kurdistanî de verdêne. Kincê mi yê kurdî seba roja veyvekîya Kurdistanî yo.”
Badê daliqnayîşê Leyla Qasime Kurdistan de bi hezaran keyeyî nameyê Leylaye bi domaanê xo danî.
