Mîyanê yew aşmî de hêrişê hemverê goristanan xeylê zêdîya. Badê goristanê Amed, Wan, Şirnex, Êlih, Muş û Colemêrgî niha zî hêrişê Goristanê Çewlîgî ame kerdene. Gorê Ekîn Morsumbul, Sevda Serînyel û Engîn Kîşînî ameyî texrîbkerdene. Kerrayê goran ameyî şikitene. Lutfiye Morsumbule bale ante hêrişê goristanê mêrdeyê xo Ekîn Morsumbulî ser o.
Lutfiye Morsumbule ewropa de tewrê kênaya xo û seba ke testê aye ê Vîrusê Korona pozîtîf vejîya nika binê karantîna de ya. Nêweşîya aye vera texrîbkerdişê gorî ci ra nêameyo vatne û tîya ra 3 rojî verê xebera texrîbkerdişî pê hesîyena. Morsumbule derheqê texrîbkerdişê goran de qisey kerde û wina va: “Tîya ra ver vistewreyê mi hetê qereqolî ra ame tehdîtkerdene. Qereqolî ra ci rê telefon yeno û telefon de wina yeno vatene; ‘Eke şima ê nuşte û fotografan nêşiknî ma do bi xo bêrî û bişiknî.’ Vistewreyê mi vejîyayîşê janê Vîrusê Korona ra dima Stenbol de asteng mend. O semed ra qala rewşa xo keno û vano ke ez nêeşkena bêra. Dima ra merdimêk ma şono qereqol. Ci ra zî wazenê ke nuşte û fotografê serê gorî bêrî vetene. Merdimê ma reaksîyon nîşan dano û qebul nêkeno. No hedîse ra dima polîsî kerrayê gorê Ekîne tecrîb kenî.”
‘Hêriş wexşet o’
Lutfiye Morsumbule dewamê qiseykerdişê xo de dîyar kerde ke hêrişê goranê bînan zî ameyo kerdene û wina dewam kerde: “Hêrişê gorê Engînî zî kerdî. Cuya înan ya qehremanîye ra tena nê gorî mendî. Gor û goristanî erjê tewr berzî yî. Verê çimanê ma de goristanan texrîb kenî. No dejo tewr gird o. Hem psîkolojî û hem zî hîssê merdimî de şikitişêk gird virazîyeno. Xora amacê hukmatî zî no yo û resa amacê xo. Gelo goristanan ra çi wazenî? Kesê merde ra heyfê çi herînenî? Hêriş wexşet o.”
‘Destanê xo merdeyanê ma ra biancêne’
Morsumbule qiseykerdişê xo de bale ante rewşa kênaya xo ser o û va: “Mi hema zî kênaya xo rê qala hedîse nêkerda. Kênaya mi hetê pîyê xo de zaf hîssin a. Ma hêrişê hemverê goristanna qebul nêkenî û ma do hemverê înan de têkoşîn biker. Ez veng dana heme dezgeyanê Heqê Merdiman û her kesê ke vano/a ez mendim a, wa qêrayîşê ma bieşnawî. Wa destanê xo yê lêşinan erjanê ma ra biancî. Wa êdî dayîk û domanî nêbî mexdur.
‘Ez umud kena ke herkes vengê ma rê bibo veng’
Lutfiye Morsumbule bale ante hêrişê goristanê mêrdeyê xo Ekîn Morsumbulî ser o û wina va: “Ez heme şehîdan ra ozur wazena. Ma nêeşkayî no zihnîyet vindarnî. Ma eşkenî dejanê xo pare bikerî û hêzê xo bikerî yew. Ganî ma pîya têkoşînê wijdanî bidî. Ez umud kena ke herkes vengê ma rê bibo veng.” ÇEWLÎG
