Ciwanên başûrê Kurdistanê ji bo şermezarkirina provakasyona PDK’ê ya li Zînî Wertê, bi pêşengiya Înîsiyatîfa Başûrê Kurdistanê û bi dirûşma ‘Em ê bi ruhê ciwantiyê dagirkeriyê têk bibin’ li Ranyayê dest bi meşa dirêj kiribûn. Di meşê de ciwanan alên başûrê Kurdistanê hilgirtibûn û dirûşma ‘Yeke yeke gelê kurd yeke’ berz dikirin. Ciwanên ji gelek bajar û navçeyên cuda yên Başûr tev li meşê bûn. Dema ku meşvan gihiştin benda Serkepkanê ji hêla hêzên ewlekariyê ve hatin astengkirin. Ciwanan ji bo domandina meşa xwe bi hêzên ewlekariyê re hevdîtin kirin.
Lê tevî hemû hewldanan jî hêzên ewlekariyê destûr nedan ku ciwan meşa xwe bidomînin. Li ser vê yekê jî ciwanan daxuyaniyek da. Di daxuyaniyê de ciwanan got ku bi piştgiriya PDK’ê li başûrê Kurdistanê 23 baregehên dewleta tirk hatine avakirin û li van baregehan 10 hezar leşkerên tirk hatine bicihkirin.
Daxuyanî wiha dom kir: “Dewlata tirk hêzên PDK’ê şandin Zînî Wertê û ew bi xwe jî bi balafiran herêmê dişopîne. Bi vî karî re jî PDK zirarê dide yekitiya neteweyî. Li hêla din em fêm nakin bê ka çima YNK destûrê nade ciwan û xelkê ku biçin Zînî Wertê. Gelo destê YNK’ê jî di plana li dijî Zînî Wertê de heye? Ev cara sêyemîne ku hêzên herêma Raperînê rê nade ku ciwan û kesayetên Başûr biçin Zînî Wertê.”
Piştî daxuyaniyê jî ciwanan meşa xwe bi dawî kir. RANYA
