261 cenazayê ke Goristanê Garzanî yê Bedlîsî ra ameybî remnayene Goristanê Kîlyosî de kişta rayîrî de û warê herinda 18 goran de pêser ameyî definkerdene. Cayê cenazayan pê beton û herî ameyî girewtene û dormeyê ci pîs o. Reyna cayê cenazayan ra boruyê kanalîzasyonî zî herikîyenê.
Endamê Komeleya Huqûqnasanê Seba Azadîye Serhat Çakmakî derheqê babete de qisey kerd û vat: ” Eşkera yo ke cenazayî pêser û sereyê înan akerde ameyî definkerdene. Heqêk o ke her yew cenaza ganî cîya bêra definkerdene. Dewlete bi nê hawayî heqê definkerdişî û definbîyayîşî pay kerdî, cenazayan rê îşkence kerd û armanc kerd ke vîrê komelkî çin bikera. Nê pêro bêhuqûqîyî nîşaneyê şerê dişmenîye yê.”
Hanîfî Cano ke birayê xo Ferhat Can (Ferhat Garzan) Goristanê Garzanî de defin kerdbi îfade kerd ke dima ke cenazayî ameyî remnayene înan wextêk ci ra xebere nêgirewte. Canî vat: ”Wexto ke ma ameyî Kîlyos ma goristan nê cayê çopan dî. Ma her tim rayaumûmîye rê ney vat la çewî vengê ma nêeşnawit. Nê kerdişî kitabêk de nênusenê. No îqtîdar vano o dîndar o la Îslam de cenazayan rê îşkence çin o.”
Serekê Komeleya Alîmanê Dînîyan ê Stenbolî Ekrem Baranî zî ard ziwan ke Îslam de tim hûrmetê cenazayan esto û vat: ”Huqûqê Îslamî de cenazayan rê dest nêno dayene. Ma nê hêrişanê vera goristanan qebul nêkenê. Nê hêrişî hem erjanê şarî rê hem zî erjanê Îslamî rê heqaret ê. Ma do nê tewirî qebul nêkerê.” STENBOL
