Vîrusê Korona ke ewilî peynîya aşmanê 2019î de bajarê Çînî yê Wuhanî de vejîya raşte û vilayê hema hema pêroyê dinya bî, pêroyê aktîvîteyan da vindetene û sîstemê kapîtalîzmî binpay kerd. Tirkîya de zî goreyê zanayîşanê fermî vakayo yewine 11ê adara 2020î de ame vînayene û aye roje ra nata Tirkîya vera vîrusî de têkoşîn dana. Nika Tirkîya de gamê normalbîyayîşî yenî eştene û qerarê abîyayîşê AVMyan, kuaforan û destpêkerdişê musabeqeyanê futbolî ame girewtene.
Derheqê babete de Hemsereka Sendîkaya Kedkaranê Xizmetê Sosyal û Weşîye (SES) ya Îzmîrî Nursel Yucesoye qisey kerde û dîyar kerde ke dayeyê vîrusî ke yenî eşkerakerdene raştîyan nîşan nêdano û hûmara testê pozîtîf û merdeyan zêde ya. Yucesoye daye zanayen ke ganî prosesê normalbîyayîşî merdiman asan nêkero.
‘Beno ke hûmare zêde biba’
Nursele ard ziwan ke beno ke hûmare hîna zêde biba û wina va: “Na qerarê normalbîyayîşî yê zanistan raşt nêvînenî. Tirkîya de hûmara testê ke ameyî eşkerakerdene nîmeyê tay welatanê ewropî çin a. Coka ganî ma testan zêde bikerî û netîce zêde bigîrî. Hûmare kêm asîyena la beno ke hîna zêde biba.”
‘Ê komel nêfikirîyenî, sermaye fikirîyenî’
Nursele dewamê qiseykerdişê xo de daye zanayene ke rêxistinê meslekî û sendîkayî heyetê pêroyî de ca nêgirewtî û bi no hawa qerarê weşîye zî nêeşkenî bêrî girewtene û va: “Her çiqas ke qerarê qedexeyî bibo zî ma peynîya hewteyî teber de kesê ke testê înan pozîtîf vejîyayî gêrenî û ê ma rê vanî ‘Ez fabrîka de ya’ ya zî bi destûrê walî xebetîyena. Xeylê fabrîkayan de rewşe wina ya. Park mekteb, dikanê şenikan padayî, la AVM û kuaforan akerdî. Nê cayî padayeyî û hewa nêgênî. Ma weşîya komelî fikirîyenî. La ê yê sermaye fikirîyenî. Badê eşkerayîya Şaredarîya Bajarê Girdî ya Stenbolî, destûrê xoresnayîşê hûmara merdeyan zî ame wedarnayene.”
Nursel tewr peynî bale ante akerdişê AMVyan ser o û va: “No qerarî reyde merdimî zî xo erzenî teber. Xebatê rêxistina weşîye yê dinya dewam kenî. Heta tu dermanêk nêameyo vînayene. Beno ke derman erê bêro vînayene. Ganî mal epik û ripêşan bixebetnî. Ganî prosesê normalbîyayîşî merdiman asan nêkero û ganî herkes vera rîskan de baldar têbigêro.” ÎZMÎR
