Vîrusê Korona ke bajarê Çînî yê Wuhanî de vejîya raşte û hema hema vilayê pêroyê dinya bî, hema zî beno sebebê mergan. Heta nika mergê tewr zêde Amerîka de virazîya û bi sehezaran kesî cuya xo vindî kerdî. Tirkîya de zî heta nika 4 hezar kesî merdî û seba pawitişî merdimî tay tedbîrî ameyî girewtene. Labelê hepsîyê sîyasî nê tedbîran de nêameyî vînayene. Qanûnê înfazî ke Vîrusê Korona de ame vetene de hepsîyê sîyasî nêameyî cakerdene. Hepsîyê cinî yê ke tarîxê cîya-cîyayan de tehlîye bîyî seba embazanê xo yê prosesê Vîrusê Korona de zîndanan de yî vengê tehlîyekerdişî dayî û dîyar kerdî ke ganî 3. paketa hukmî de embazê înan zî va bigêrî.
‘Rîsko tewr zêde zîndan î’
Hepsîyan ra Gulîstan Yusmaya ke verê zîndan de menda qisey kerde û ard ziwan ke aye şertê zîndanana baş zana û ewja de hîjyen tay o. Yusmaye qiseykerdişê xo de wina va: “Vîrus de rîsko tewr zêde zîndan î. Ma wazenê ke embazê ma yê sîyasî zî paketê hukmî de ca bigêrî. Hema ke wext esto ganî embazê ma serbest bêrî veradayene.”
‘Ez seba embazanê xo tehlîye wazena’
Hepsîya kehen Dîlan Aya ke verê zîndan de menda û nika zî waya aye Jiyan Aye Zîndanê Cinîyan ya Bunyazî de tepişteya va: “Zîndanan de rîskêk zêde esto. Kelûpelê pakîye tay î. Ma wazenê ke embazê ma yê sîyasî zî paketê hukmî de ca bigêrî. Waya mi hucreyo yew kesî de yena tepiştene. Ez zî verê cû zîndan de menda. Ez waya xo û embazanê aye rê tehlîye wazena.”
‘No vîrus merdiman yewbînan ra cîya nêkeno’
Berîvan Bayindire zî daye zanayene ke aye aşmêk verê ameya tehlîyekerdene û reaksîyon nîşanê qanûnê înfazî daye û wina va: “Bi hezaran hepsîyê edlî badê paketî serbest ameyî veradayene. La çi heyfo ke hepsîyê sîyasî paket de ca nêgirewtî. Ma wazenê ke hepsîyê sîyasî zî serbest bêrî veradayene.”
‘Ma nêwazenî zîndanan ra cenaze bivejîyî’
Hepsîyê verêne yê cinîyan ra tewr peynî Vesîle Yuksela ke tewrê 2 domanê xo yê şenikan zîndan de menda qisey kerde û înan ard ziwan: “Waya mi Zîndanê Tîpa Tyî yê Şakranî de tepişte ya. Ma wazenê k eheme hepsîyî azad bibî. Ganî bi lez edalet pê bêro. Êdî bes o. Ganî ma paştî bidî hepsîyanê sîyasî. Wa êdî no bêvengî biqedîyo. ‘Ma nêwazenî zîndanan ra cenaze bivejîyî. Azadîye heqê merdimîye ya.” MÊRDÎN
