Pêla faşîzmê ya li dewleta tirk her ku diçe zêdetir û xeternaktir dibe. Li hêlekê hikûmeta AKP-MHP’ê bi hemû rê û rêbazan şovenîzmê gur dike û li hêla din jî hem di hêla leşkerî û hem jî di hêla siyasî, civakî û çandî de li dijî gelê kurd êrîşên dijwar pêk tîne. Ji ber polîtîkaya şovenîzmê ya dewletê, roj naçe ku kurd li bakurê Kurdistanê û Tirkiyeyê rastî êrîşên nîjadperest neyên.
Di vê çarçoveyê de şevê din saet derdora 22.30’an de li navçeya Etîmesgut a Enqereyê, ciwanê bi navê Bariş Çakan (20) bi hinceta ku muzîka kurdî guhdarî dike hate kuştin. Li gorî agahiyan, Çakan ku ji navçeya Panos a Agiriyê ye dema li gel hevalê xwe li parkê rûdinişt bi sedema ku muzîka kurdî guhdar dike rastî êrîşa 3 kesan hat.
Li gel kesên êrîşkar kêr hebûn û ev kes yek jê ji Yozgatê, yek jê ji Kirikkaleyê û yek jî ji Tokatê bû. Êrîşkarên ku Çakan kêr kirin, 2 kêr li dilê Çakan dan. Çakan ê ku bi giranî birîndar bûyî rakirin Nexweşxaneya Taybet a Etîmadê lê belê jiyana xwe ji dest da.
Her sê êrîşkar hatin binçavkirin. ENQERE
