Wendekarê Unîversîteya Munzurî prosesê Korona de agêrayî şaristananê xo. Ame zanayene ke Dêrsim de wayîrê keyeyan wendekaran rê telefon kenê û wazenê ke wendekarî keyeyan veng bikerê. Wendekaran ard ziwan ke dima ke lojmanê leşker û polîsan rijîyayî, keyeyî înan rê pê vayêka zêdêre yenê kîrakerdene. Wendekaran da zanayene ke polîs û leşkerê ke seba ke ca nêvînenê cayê mendişî yê zanîngehî manenê. Wendekaran îfade kerd ke na rewşe dima ke leşker û polîsan dest pê cigêrayîşê keyeyî kerd vejîyaye werte û şarê Dêrsimî ra waşt ke wayîrê înan bivejîyo.
Wendekarê Unîversîteya Munzurî Cengîz Fîdanî vat: ”Keyeyê ma dîyenê karmendan. Çunke karmendî vaya zêdêre danê. Xora pandemîye ra şert û mertê cuya ma zî zaf bîyî zehmet. Ma wina zanayêne ke şarê Dêrsimî wayîrê wendekar, şar û xozaya xo vejîyeno. Ma pawenê ke şar wayîrê ma bivejîyo. Eke ma abigêrê zanîngeh ca çin o ke ma tede bimanê. Seke mi eşnawit 15 wendekarî keyeyanê xo ra ameyî vetene.”
Wendekar Ekrem Atmacayî zî wina qisey kerd: ”Prosesê janî ra nata wayîrê keyeyê ma telefon keno û vano ma keye veng bikerê. Şaristan de pêro keyeyî dîyenê leşker û polîsan. Ma rê keye nêmend.” DÊRSIM
