Ameyîşê hamnanî reyde deştanê Mêrdînî de wextê arêdayîşê masulan ame. Cinîyê herême xêşeyanê xo pir kenî û baro giran reyna cinî wedarnenî.
‘Ma bi saetan binê tîjê roje de vindenî’
Cinîyan ra Aysel Dînça ke dewa Giremîra ya pabesteyê qezya Nisêbînî ya Mêrdînî de cuyena, her serre no çaxan de seba heywananê xo pûşê ke erd ser de manenî arê dana. Aysele binê germîya hamnanî de bi saetan xêşeyan pir kena û va: “Sere de makine xele arê dano û pey makine de simerê ci maneno. 2-3 traktorî yenî veng kenî. Ma zî xêşeyan pir kenî simer. Ma bi saetan binê tîjê roje de mîyanê erdî de vindenî. Karêko zehmet .”
‘Hetê zehmet ma rê maneno’
Aysele qiseykerdişê xo yê peyênan de daye zanayene tewr zehmet arêdayîşê masulî û arêdayîşê simerî yo û wina qedênaye: “Seba ke heywanê ma aşmanê zimistanî de vêşan nêmanî, ma simer arê danî. Kesê ke no karî kenî û ci ra pere qezenc kenî zî estî. La ma tena seba heywananê xo arê danî. Ma simer arê danî û dima dekenî axur. Eke ma simer arê nêdî heywanê ma do vêşan bimanî.” MÊRDÎN
