14ê hezîrane de qezaya Kanîreşî ya Çewlîgî de bi şîdetê 5.6î erd lerzîya, vizêr zî bi şîdetê 5.6î reyna erd lerzîya.
Partîya Demokratîke ya Şaran (HDP) erzlerzî ra dima heyetêk awan kerd. Heyetê HDPyî şi herêma erdlerzî û tay cigêrayîşî kerdî. Heyet de Parlementerê Çewlîgî Erdal Aydemîr û Îdareyê HDPyî yê Çewlîgî zî estbî. Aydemîr û heyetî qezayê Kanîreş û Çêrme zîyaret kerdî. Aydemîrî dewanê Armelî, Dînar Beg yê Çêrme û dewa Lîcîkî ya Kanîreşî de mexdûranê erdlerzî reyde pêvînayîş kerd û hewcedarîyê şarî qeyd kerdî.
Aydemîrî da zanayene ke erdlerz de bi taybetî dewa Armelî ya Çêrme zerar dî. Aydemîrî îfade kerd ke dewa Armelî û dewekanê ci de se ra 70ê keyeyî texrîb bîyî û yewê ci giran 4 birîndarî estê ke nêweşxaneyan de binê tedawî de yê. Aydemîrî ard ziwan ke dewa Lîcîkî ya Kanîreşî de zî hema hema keyeyêk nêmend pêro texrîb bîyî û rewşe zaf bitehluke ya.
Hetê bînî ra wexto ke Heyetê HDPyî ver bi merkezê Çewlîgî şîyêne rayîr de kerrayê ke erdlerzî de koyan ra qerifîyayî, rayîr girewt û heyet rayîrî ra mend. Heyet dima hetê Erziromî ra resa merkezê Çewlîgî. ÇEWLÎG
