‘Rayraşîyayîşê Demokrasîyî’ yê Vera Darbe’ yo ke Partîya Demokratîke y Şaran (HDP) Edîrne û Colemêrgî ra ver bi Anqara da destpêkerdene, dewam keno. Perrê rayraşîyayîşî yê Colemêrgî resa Wan û 2 rojî yo ke tewrê bernameyanê şaristanî beno. Beşdarî ewro zî şîyî Bedlîs. Endamê partîye bînaya HDPyî ya Wanî de kom bîyî û pankarta bi nuşteyê ‘Ma pîya’ akerde û eşkerayîye daye.
Hemsereka Pêroyî ya DBPyî Salîha Aydenîz pare kerd ke ê Colemêrgî de bi coşêkî ameyî pêşwazîkerdene, heman coş Wan de zî bi. Aydenîze vat: ”Rayraşîyayîşê ma do hêz bido demokrasî û ma Bedlîsî ra dima do biresê Amed. AKP û MHPyî pê bahaneya Korona wazena rayraşîyayîşê ma vindarnê. Derdê înan Korona nê, tersê demokrasîyî yo.
Ma hêrişê vera Mexmûr û Şingalî şermezar kenê. Îqtîdar şer û faşîzm de israr keno û demokrasî, azadîye û têdûştîye ra terseno. Rayraşîyayîşê ma do heta Anqara dewam bikero û 20ê hezîrane de biqedo. Rayraşîyayîşê ma seba awanîya demokrasîyî yo.Heta ke faşîzm biqedo rayraşîyayîşê ma do dewam bikero. Her ke ma demokrasî de israr kenê, ê zî şer de israr kenê. Ganî şarê Tirkîya vera faşîzmî pîya têbigêrê. Ma reyna Wanî rê sipas kenê.” WAN
