Dêrsim de wendekarê Unîversîteya Munzurî cayê mendişî yê unîversîteye ra yenê eştene, înan rê cezaya dîsîplînî yena dayene. Hetê bînî ra seba ke kîrayî zaf bîyî vay wendekarî nêeşkenê keyeyan de zî bimanê. Parlementerê Partîya Demokratîke ya Şaran (HDP) yê Dêrsimî Alîcan Onluyî pê vernîyazêkê persî babete berde rojdemê Meclîsî. Onluyî waşt ke Wezîrê Perwerdeyî Zîya Selçuk cewab bido vernîyazê persî.
Onluyî vat: ”Wendekarê Unîversîteya Munzurî cayanê mendişî yê unîversîteye ra yenê eştene. Seba ke kîrayî zêdêr ê nêeşkenê keyeyan de zî bimanê. Bi taybetî dima ke lojmanê leşker, cendirme û hêzanê asayîşî rijîyayî Dêrsim de kîrayî bîyî zaf vay. Wayîrê keyeyan ê ke wazenê keyeyê xo bidê leşkeran wendekaran keyeyî ra erzenê.
Onluyî nê persî Zîya Selçukî rê persayî
*Dêrsim de çend cayê mendişî yê unîversîteye estê û kapasîteya înan çendek a?
*Raşt a ke wendekarî wexto ke kîraya xo erey danê înan rê cezaya dîsîplîne yena dayene û cayê mendişî ra yenê teberkerdene?
*Emser çend wendekarî nê semedî ra cayê mendişî ra ameyî teberkerdene û cezaya dîsîplînî girewte?
*Derheqê na mesele de şima xebatêka senîne kenê? ANQARA
