Navenda Nûçeyan |
Koordînasyona Komîteyên Başûr a Encûmên Civaka Niştimanî ya Kurdî li Derveyî Welat (KCDK-E Başûr) têkildarî êrîşên dewletên tirk û Îranê yên li ser başûrê Kurdistanê daxuyaniyek weşand.
Di daxuyaniyê de îşaret bi berxwedana gerîla ya li dijî êrîşên dagirkeriyê hate kirin û hate destnîşankirin ku li nava bajar û gundan jî nerazîbûn, serhildan û berxwedan heye.
Koordînasyonê diyar kir ku vê yekê bandoreke mezin li rewşa derûnî ya dewleta tirk kiriye, ew xistiye nava rewşeke aloz û wiha got: “Li hemberî van şikestinên mezin dewleta tirk bi rengekî hovane êrîşî deverên Behdînan û bajarokê Şêladizê kir. Bi hêza leşkerî û balafiran ev dever bombebaran kir. Di encamê de 6 sivîl jiyana xwe ji dest dan.”
KCDK-E Başûr xemgîniya xwe ya ji ber vê yekê parve kir û destnîşan kir ku ev yek di heman demê de cihê şerm û şermezariyê ye ji bo serokatiya herêmê bi taybetî jî PDK’ê.
Di daxuyaniyê de berxwedana gelê kurd a li qadan a li dijî van êrişan hate bibîrxistin û wiha hate gotin: “Ya ku li herêmê diqewime destnîşankirina hebûn û tunebûna me ye; gelo em ê weke kole bênasname bijîn an jî bibin kurdekî azad ê xwedî nasnameya xwe. Ev rastiya vî şerî ye ku ji aliyê dewleta faşîst a Tirkiyeyê ve hatiye destpêkirin û şer dewam dike.”
Her wiha KCDK-E’yê bang li gel kir ku xeteriya vê rewşê bibînin û daxuyanî wiha bi dawî bû: “Dema nakokiyan êdî qediya ye. Bêdengiya li hemberî vê dagirkeriyê xetereke cidî ye. Pêdivî heye ku em çalakiyên xwe bi wijdan, mîna şoreşgeran bi rê ve bibin ku çalakî û meşên xwe li dijî dewletên faşîst ên tirk û Îranê bidomînin. Em bi hev re li dijî dewleta tirk a faşîst kolanan bi coş, bi hêrs dagirin û bi ruhekî berxwedêr û şoreşgerî hefteya hêrsê dewam bikin. Em bi xwe û gelê azad ê Kurdistanê bawer in ku bi alîkariya gelê me yê şoreşger û bi pêşengiya gerîlayên azadiyê em ê li dijî faşîstan bi ser bikevin.”
