Dijminatiya dewleta tirk û qeyûmên wê ya li dijî kurdî û Kurdistanê didome. Qeyûmên ku li şûna nûnerên vîna gelê kurd hatine tayînkirin, weke karê destpêkê êrîşî ziman û çanda kurdî dikin. Yek ji van êrîşan jî herî dawî li Êlihê ji hêla qeyûm hate kirin.
Qeyûmê dewleta tirk li Êlihê nivîsa kurdî ya ‘Pêşî peya’ ku ji hêla Şaredariya Êlihê ya HDP’î ve li ser rêya Bulwara Acetlerê hatibûn nivîsandin, jê bir. Têkildarî mijarê hevşaredarê Êlihê Dr. Mehmet Demîr ku li şûna wî qeyûm hatibû tayînkirin li ser hesabê xwe yê twîtterê peyamek parve kir.
Demîr di peyama xwe de wiha got: “Ji qeyûmê Êlihê dijminatiyek din a li ser kurdî. Nifûsek mezin ê Êlihê bi kurmancî diaxive. Me ji bo ewlehiya xelkê xwe, bi kurmancî ‘Pêşî peya’ li ser rêyan nivîsandibû. Qeyûm nivîsa kurmancî jê bir û bi tirkî nivîsand. Qeyûm dijminê kurdan e.” ÊLIH
