Dewleta tirk şevê din bi balafirên keşfê êrîşî gundê Helincê yê Kobanê kir. Di encama êrîşê de endama Koordînasyona Kongreya Star a Herêma Firatê Zehra Berkel, xwediya malê Emîna Weysî û jineke din jiyana xwe ji dest dan. Rêveberiya Xweseriya Demokratîk a Herêma Firatê têkildarî mijarê daxuyaniyek da û êrîş şermezar kir.
Di daxuyaniyê de rêveberiya xweser êrîşa dewleta tirk weke êrîşeke terorîstane pênase kir û wiha domand: “Berpirsyarê vê êrîşê Rûsya ye. Ji ber ku li gorî lihevkirina beriya 7 mehan, Rûsya berpirsa ewlehî û aramiyê ye. Banga me ji Rûsyayê ew e ku li gorî sozên dane tevbigere û li dijî êrîşên terorîst ên dewleta tirk bisekine.”
Bi domdarî jî rêveberiya xweser bang li hêzên DYA û koalîsyona navdewletî jî kir ku erkên xwe pêk bînin û li gorî lihevkirina agirbesta di navbera DYA û dewleta tirk de tevbigerin û sînorekî ji êrîşên dewleta tirk re deynin.” KOBANÊ
