Baroyê Çewlîgî derheqê Erdlerzê Kanîreşî de ke 14ê hezîrane de qewimîya, çimdarî, tesbît û ercnayîşê xo pê raporêk pêşkêş kerdî.
Raporê Baroyê Çewlîgî wina yo:
Çimdarî û Tesbîtî
”-Rayîrê Kanîreşî û Çêrme yê ke teng ê û mabênê koyan de yê, resnayîşê hetkarîye de bîyî sebebê astengîyan. Erdlerz de kerrayî dekewtî nê rayîran, rayîrî qelişîyayî ra û coka zemîn seba hezazî bîyî musaîd.
-Seba ke rayîrê dewan xeripîyaye bîyî malzemeyê hetkarîye yê sey xeyme erdlerzî ra rojeke dima ameyî resnayene dewan.
-Dewijan îfade kerd ke erdlerzê 2005î de xeylêk zerar resa keyeyanê înan û rixmo ke îna waşt keyeyê neweyî nêvirazîyayî. Dewijan da zanayene ke nê keyeyî Erdlêrzê Kanîreşî de bi temamî rijîyayî.
-Hetê muxtar û dewijan ra ame parekerdene ke dewa Armelî de pêro heywanê dewijêkî binê erdlerzî de mendî û telef bîyî.
-Erdlerz de dewekan de têkilîya mobîlî birîyaye.
Netîce û Pêşnîyazî
-Seba ke Çewlîg serê di fayanê erdlerzî de yo ganî Unîversîteya Çewlîgî de Merkezê Cigêrayîşê Erdlerzî û yewina simulasyonî bêrê awankerdene.
-Reyna ganî binê sîwana Unîversîteya Çewlîgî de beşê weşîye û beşê mudaxeleyê lezabezî bêrê awankerdene ke ekîpê pisporî bêrê perwerdekerdene.
-Ganî ekîpê teknîkî hemwelatîyê şaristanî bibê ke şarî reyde hetê ziwan û têkilîye ra meseleyêke nêvejîye werte.
-Ganî herinda awanîyan ê rijîyayeyan û texrîbbîyayeyan de awanîyê neweyî bivirazîyê.
-Şarî rê hetkarîya madîye wa bêra kerdene.
-Ganî rayîrê Kanîreş-Çêrme bêrê hîrakerdene û newe ra bivirazîyê.
-Ganî zêdêr îstasyonê mobîlî bêrê ronayene.
-Ganî erazîyanê zîretî ser o viraştişê awanîyan bêrê qedexekerdene.
-Ganî ganî mesuldarîyê awanîyan ê rijîyayeyan û texrîbbîyayeyan bêrê tesbîtkerdene û derheqê înan de tehqîqat bidîyo destpêkerdene.” ÇEWLÎG
