Navenda Nûçeyan |
Komeleya Mafê Mirovan a Kurdistanê (KMMK) bi daxuyaniyekê ragihand ku hêzên Îranê girtiya siyasî ya kurd Zeyneb Celaliyan ji girtîgeha Qerçek a Weramînê veguhestine cihekî nediyar. Komeleyê da zanîn ku haya malbata Celaliyan ji rewşa heyî nîne.
Hat zanîn ku hêzên rejîma Îranê ji ber ku girtiya siyasî ya kurd Suheyla Hebîb bertek nîşanî veguhestina Zeyneb Celaliyan daye, derb kirin. Hebîb ji dest û lingên xwe birîndar bûye.
Girtiyên siyasî yên kurd Zeyneb Celaliyan, Suheyla Hebîb û Sekîne Perwane ji bo ku daxwazên wan pêk bên, ji 20’ê hezîranê ve li Girtîgeha Qerçekê di greva birçîbûnê de ne. Li gorî daxuyaniya komeleyê, Celaliyan ji roja pêncşemê ve hatiye veguhestin lê kes nizane bê ka bi ku de birine.
Hêjayî bibîrxistinê ye ku Zeyneb Celaliyan di 27’ê gulana 2020’an de ji Girtîgeha Xoyê sewqî girtîgeha Qerçek a nêzî Tehranê hatibû kirin.
