Merkezê Xeberan]
Hektara Hemserekanê Pêroyî ya Partîya Demokratîke ya Şaran (HDP) ya Komsîyonê Şar û Bawerîyan ra Berpirsîyare Tulay Hatîmogullariye bi wesîleya şehadetê Şêx Seîd û 47 embazanê ci yê ke 29ê Hezîrana 1925î de Amed de ameybî daliqnayene eşkerayîyêka nuştekî weşênaye.
Eşkerayî wina ya:
“Şêx Seîd û 47 embazê ci hetê Mehkemaya Îstîklalî ra 29ê Hezîrana 1925î de Raşteyê Berê Koyî yê Amedî de ameyî daliqnayene. Daliqnayîşê înan ra 95 serrî derbaz bî. Ma serrgêra qetilkerdişê înan de Şêx Seîd û 47 embazê ci bi rêzdarî vîr anî.
Şêx Seîd û embazê ci roja ke ameyî daliqnayene ra heta nika heme kitabanê tarîxî yê fermî de û eşkerayîyanê selahîyetdaran de tewirêkna yeno vatene û têkoşînê înan ê edaletî yê seba şarê kurd û heqdar sey serewedartişê seba şerîetî yeno biname kerdene.
Raştkerdişanê qanûnî yê ke serra 1923î de bi îlankerdişê komarî reyde pê ameyî, polîtîkayê dewlete sey merkezperestîyêko şîdetin nîşan da. Tarîxê sîyasî yê Tirkîya de şikîyayîşê tewr gird bi bedilnayîşê polîtîkayan reyde pê ame. Cografyaya qedîm ya zaf rengî û zaf kulturî de nîjadperestî ame ferzkerdene. Her ke no polîtîka xorî bî, Tirkîya de têkilîya rayîrberîye ya mabenê dewlete û komelî de birînanê xorîyan akerde. Heta ke nê birînî nêrî munaqeşekerdene, rî bi rî mendişê têgêrayîşê Şêx Seîd û embazanê ci mumkun nîyo.
Sey Planê Islahkerdişî yê Şerqî vera kurdan de ewro polîtîkayê înkarî asîmîlasyon û çinkerdişî kewtî dewre ke AKP-MHP wayîrê ci vejîyenî. Eşkerakerdişê raştîya peynîya kiştişê Şêx Seîd û embazanê ci do tarîxê Tirkîya de gamêk cidî bêro eştene.
Ganî herinda têmîyankerdişî hedîseyê daliqnayîşê Şêx Seîd û embazanê ci bi raştîyan bêro eşkerakerdene. Ganî kesê ke qetlîyam de rolê înan estî bêrî eşkerakerdene. Ganî cayê mezelê Şêx Seîd û 47 embazê ci keyeyanê înan û rayapêroyî rê bêro vatene.”
