Berdevka Meclisa Jinan a Partiya Demokratîk a Gelan (HDP) Ayşe Acar Başaran li Navenda Giştî ya HDP’ê der barê êrîşên li dijî jinan civîna çapemeniya li dar xist. Başaran ji ewil kesên di komkujiyên Sêwaz û Çorûmê de jiyana xwe ji dest dabûn bi bîr anîn û da zanîn ku ligel ku bi ser komkujiyê re bi dehan sal derbas bûn jî, hê jî cihêkariya li dijî elewiyan didome.
Başaran da zanîn ku ji ber kiryarên desthilatdariyê rojane jin tên kuştin û wiha dom kir: “Li gorî danayên fermî, di dema AKP’ê de 7 hezar û 500 jin hatin qetilkirin. Di nava van daneyan de hejmara mirinên biguman ên jinan nînin. Di rastiyê de rewş girantir e. Dîsa di rojên dawî de di bin navê întîxarê de mirinên jinan pir zêde bûne. Tenê li Agiriyê di nava 35 rojan de 5 jin bi awayeke biguman mirin. Lê ev bûyer weke întîxarê di qeydên fermî de cih girtin.”
Bersiv da gotinên serokwekîla koma AKP’ê
Bi domdarî jî Başaran got ku divê meclis di vê mijarê de berpirsyartiya xwe bi cih bîne. Başaran gotina serokwekîla Koma AKP’ê ku di got; ‘Beriya AKP’ê navê jinan tune bû’ bi bîr xist û ev tişt anî ziman: “Weke ku yên lêkolînkirina mirinên jinan asteng dikin, li her qadê êrîşî jinan dikin, bi destê polîs û leşkeran îşkence li jinan dikin, Peymana Stenbolê li nîqaşê vedikin, qanûna 6284 bi cih nayînin, serlêdanên jinan ên ji bo malê stargehan radiwestînin û tundiya li dijî jinê zêdekiriye ne desthilatdariya AKP’ê be, tevdigere. Berî her tîştî divê ev rastî bê dîtin.”
Ji bo meşan bang kir
Ayşe Acar Başaran wiha dawî li axaftina xwe anî: “Em ê di çarçoveya kampanyaya ‘Jin li her derê ne’ li dijî komkujiyên jinan ên weke întîxarê tên nîşandan, li 5 bajaran bimeşin. Ji bo ku dengê jinan bêhtir bê bihîstin em ê li 5 bajaran bimeşin. Ji ber ku tundiya li ser jinan û bûyerên întîxarê lê zêde dibin em ê li Agiriyê, ji bo pirsîna aqûbeta Gulistan Doku li Dêrsimê û em ê piştre jî li Stenbolê bimeşin. Banga me li hemû jinan ew e ku tev li meşan bibin.” ENQERE
