Êrîş û bombebaranên dewleta tirk ên li ser xaka başûrê Kurdistanê didomin. Tevî vê jî ne hikûmeta herêmê û ne jî ya navendî helwesteke cidî nîşan nedaye. Li hêla din, bertekên gelê Başûr ên li dijî êrîşan jî zêde dibin. Têkildarî mijarê mamosteyên Dihokê ji Rojnewsê re axivîn.
Mamoste Hekar Zûbêr diyar kir ku helwesta hizb û aliyên siyasî yên Başûr cihê şermezariyê ye û wiha got: “Sedema vê bêhelwestiyê jî berjewendiyên aborî û bazirganî yên hinek partî û aliyên siyasî yên bi dewletên cîran re ne. Divê hemû kes li dijî êrîşan xwedî helwestekî tund be. Heke her kes xwedî helwest be dê li dijî dagirkeriyê qada navneteweyî jî zextê bike.”
Gel li dijî dagirkeriyê nerazî ye
Têkildarî mijarê mamoste Mêhvan Seîd jî ev tişt anî ziman: “Gel li dijî dagirkeriyê nerazî ye û dixwazin li dijî êrîşên dewleta tirk helwestek hebe. Lê ji ber astengiyên tund ên PDK’ê û desthilatên Başûr, nikarin helwesta xwe nîşan bidin. Yên li ser medyaya civakî bertek nîşan didin jî rastî sûcdariyên hikûmeta Başûr ên weke provokasyon û aloziyê tên. Dewleta tirk bi aşkerayî başûrê Kurdistanê dagir dike û sivîlan qetil dike. Lê dîsa jî xelk nikare bertekekî biçûk jî nîşan bide.” DIHOK
