Wendekara Unîversîteya Munzurî Gulîstan Dokuya 21 serrî 5ê çeleyî ra nata vindîbîyaye ya. Netîceya xebetanê cigêrayîşî Gulîstane ra rêçêk nêame dîyene û tehqîqatê serdozgerîye zî aver nêşino. Seba ke babîyê gumandarê yewînî Zainal Abarakovî polîs o serebût sey ‘xokiştişî’ yeno mojnayene. Bi fermanê Wezîrîya Karê Zerre xebata cigêrayîşê Dokuye ame vindetene.
Cinîyê Partîya Demokratîke ya Şaran (HDP) fînalê Kampanyaya ”Têkoşînê cinîyan her cade yo” semedê Gulîstan Dokuye ya vînîbîyaye do Dêrsim de bikerê. Hemsereka HDPyî ya Dêrsimî Nurşat Yeşîle semedê tewrbîyayîşî veng da.
Meclîsê Cinîyan ê Partîya Demokratîke ya Şaran (HDP) aşmêke verê cu bi sloganê ”vera îstîsmar, înfaz, qeyûm ma estî, têkoşînê cinîyan her ca de yo” dest pê kampanyayêke kerdbi. Cinîyanê ke xeylêk bajaran de çalakîyî kerdî û fînalê kampanya seba ke bale binance rewşa Gulîstan Dokuye ser do Dêrsim de bikerê.
Hemsereka HDPyî ya Dêrsimî Nurşat Yeşîle veng daye cinîyan ke wa siba saete 13.00î de Kuçeyê Sanatî de bêrê pêser. Yeşîle vist vîrî ke bi aşmeno derheqê aqibetê Gulîstan Dokuye de zanayîş nêno girewtene û vat: Têna serê xokiştişî de vindene la gerek roja verêne ra babete sey cînayet û remanyîş biameyêne destgirewtene. Gulîstan Dokuye a verêne nîya ke çîyo wînayên yeno ser la a bîye sembole. Naye de rolê keyeyê ci û têkoşînê cinîyan esto. Ma do destûr medê ke ê serê naye bîgêrê. Vengdayîşê ma cinîyan rê oyo ke wa siba vera şîdet û qirkerdişê vera cinîyan vejîyê kuçeyan. DÊRSIM
