Endama Heyetê Rayberdişî yê Merkezî yê Komeleya Heqê Merdiman (ÎHD) Nuray Çevîrmene bale ante ser ke zîndanan de binpaykerdişê heqanê tepişteyan zêdîyenê. Çevîrmene vist vîrî ke xeylêk tepişteyî zîndanan de grevê vêşanîye de yê, ÎHDyî rê zîndanan ra zaf muracatî yenê. Çevîrmene ard ziwan ke hûmaritişê payanserî yeno kerdene û heqê tepişteyan yenê astengkerdene û tedaya tepişteyan dewam kena. Çevîrmene îfade kerd ke Herêma Anatoliaya Mîyanêne de û cayanê bînan de grevê vêşanîye dest pêkerd.
Çevîrmene vat: ”Zîndanê Osmanîye de tepişteyo ke lingê ci de şarapnel esto û nêno weşkerdene dest pê grevê vêşanîye kerd. Prosesê janê Korona de zî binpaykerdişî zêdîyayî. Tepişteyî hucreyanê yewkesî de yê. Tepişteyan rê mektubê ci nêdîyenê, nêwedarîyenê nêweşxane, derman nêdîyeno ci û xeylêk meseleyê bi nê hawayî zîndanan de estê.”
Çevîrmene pare kerd ke sereştişê keyeyan de, eşkerayîyanê çapemenîye de, rayraşîyayîş û çalakîyan de zî heqê merdiman yenê binpaykerdene û vat: ”Bi taybetî îşkenceyê wextê destbendkerdişî zêdîyayî. Pê kutikan îşkence yeno kerdene. ”
Nuray Çevîrmene daye zanayene ke rewşa weşîye ya tepişteyan ê nêweşan bena giranêr û vat: ”Ganî tepişteyê nêweşî cade bêrê veradayene. Xeylêk tepişteyê nêweşî cara merdî. Ganî dewlete giranîye bida na mesele ser. ” ANQARA
