Navenda Nûçeyan |
Dîwana Hevserokatiyê ya Kongreya Civaka Demokratîk a Kurdistaniyên li Ewropayê (KCDK-E) li ser çalakiyên ku dê 18 û 19’ê Tîrmehê bi wesîleya salvegera Şoreşa Rojava ji aliyê platformên Women Defend, Înternatînalîst Commûne, Make Rojava Green Agaîn û RîseÛp4Rojava bên lidarxistin, daxuyaniyek weşand.
Di daxuyaniyê de hate diyarkirin ku beriya 8 salan di 19’ê Tîrmehê de bi pêşengiya jinan, şoreşa jiyana hevpar, wekhev, azadîparêz a gel û baweriya li Rojava şoreş pêk hat û wiha hat gotin: “Şoreşa ku li Kobanê, li Rojava dest pê kir, bû mînak û hêvî ji tevahiya mirovahiyê re. Şoreşa civakî ya Rojava, têkoşîna hevpar a bawerî û gelan û azadîparêziya jinê û ekolojîk ku xwe dispêre felsefe û paradîgmaya konfederalîzma demokratîk a Rêber Apo, bi afirandina jiyana hevpar bû sîstemeke ku çareseriyê diafirîne û ji bo çareseriyeke mayinde bû hêvî ji tevahiya gelên herêmê re.”
Di daxuyaniyê de îşaret bi berxwedana destanî ya li Kobanê û Rojava li dijî çeteyên DAIŞ’ê hate kirin û wiha hat gotin: “Bi vê berxwedanê re Rojava li Rojhilata Navîn û li nava tevahiya mirovahiyê deng veda, piştgirî wergirt. Ne tenê kurd, ereb, asûr û tirkan, her wiha gelek enternasyonalîstên ji Ewropa, Emerîka, Kanada, Rojhilata Dûr û gelek parzemînan tev li berxwedana mirovahiyê bûn û şoreşa Rojava pêk anîn.”
Di daxuyaniyê de hate bibîrxistin ku dewleta tirk a kujer ku xwedî îdeolojiya tekperest û paşerû ye, ji bo fetisandina şoreşa jinê ya wekhev, azadîparêziyê bi her rê û rêbazên qirêj êrîş dike û ev tişt hate diyarkirin: “Dewleta tirk a dagirker hem dixwaze şoreşê bifetisîne, hem jî çeteyên mîna DAIŞ’ê bixe nava liv û tevgerê. Bi rêya van çeteyan dixwaze xewn û xeyalên Neo-Osmanî pêk bîne. Ev êrîş hem ji bo gelên herêmê hem jî ji bo tevahiya mirovahiyê metirsiyeke mezin e. Parastina Rojava ku nirxê hevpar ê mirovahiyê ye û xwedîderketina li wê xwedîderketina li nirxên mirovahiyê ye.”
KCDK-E’yê di vê çarçoveyê de bang li her kesî kir ku 18 û 19’ê Tîrmehê tev li çalakiyên xwedîderketina li Rojava bibin ku ji aliyê dostên enternasyonalîst ve tên lidarxistin.
