Serra 2010î de herêm Xirêbe ya ke mabênê dewa Dirbanî ya qezaya Mazgêrdî û dewanê Sorek, Lemkî û Koderiçî yê Pêrî de ya, ameyêne plankerdene ke ocaxa kerrayan bivirazîyo. Nêrazîbîyayîşê şarî ra dima plan ame batalkerdene û herême sey warê SÎTî ameye îlankerdene. 10 serran ra dima planê viraştişê ocaxê kerrayan reyna ame rojdem. Eke herême de ocaxê kerrayan bivirazîyo pêro çimeyê awe, jîyargeyî, erazîyê zîretî û heywankerîye binê tesîrê ci de do bimanê.
Hemwelatîyanê dewa Koderiçî îfade kerd ke ê do nêverdê ocax bêro akerdene. Dewijan ra Duzgun Gundogduyî vat: ”Ma nêwazenê tîya de ocaxê kerrayan bibo. Eke ocax bêro akerdene cuya ma hînî qedîyena, çin bena. No rant se serran o ke dewam keno. Na cografya zaf qirkerdişî dîyê. Yeno waştene ke merdimî erjanê xo ra dûrî bibê. ”
Gultena Gundogduya ke pê heywankerîye debarê xo kena vat: ”Eke wina yew xebate dest pêbikera ma do pêro vera ci vinderê. Ma nê erdî de ciwîyenê, ê nêeşkenê erdê ma destê ma ra bigêrê. Xozaya ma do texrîb biba, heywanê ma do zerar bivînê. Vanê dînamîtan. Dînamîtî do zerar bidê ma. Wa her kes na mesele de hîsger bibo.”
Dewij Soner Alîmî zî ard ziwan ke ocaxê kerrayan vera kultur, bawerî, heywan û xoza do bibo hêrişêk û vat: ”Heskîf de înan tarîxêk çin kerd. Nika zî wazenê Dêrsim de bikerê. Ma naye nêwazenê. Tîya cayê ma û heywananê ma yo. Heta ke destê ma ra bêro ma do têkoşîn bikerê. Eke hewce bibo ma do verê daran de bikewê ra. Wa şarê ma nêvajo heywanê mi, darê mi çin ê. No erd ê ma pêroyînan o.”
Kenan Samurî zî vat: ”Ma do erdê xo terk nêkerê û têkoşîn bikerê. Wezîfeyê ma yo ke ma wayîrê nê erdî bivejîyê.” DÊRSIM
