Meşa du rojan a navbera bajarên Celle û Hannoverê yên Almanyayê bi dirûşma ‘Na ji qirkirine re, statu ji Şengalê re’ dest pê kir.
Meşvan saet di 10:30’î de li parka li pêşiya Şaredariya bajarê Celleyê li hev kom bûn. Piştî deqeyeke rêzgirtinê, bi navê komîteya amadekar Çîçek Fîkret û Cercûr axivîn.
Endamên komîteya amadekar bal kişand ser girîngiya yekitiya kurdan û xwestin ku Şengal bibe xwedî statuyekê û destnîşan kirin ku bi statuya Şengalê pêşî li qirkirinên nû dikare bê girtin.
Meş ji aliyê Meclisa Şengalê ya li Derveyî Welat ve tê lidarxistin.
Di meşê de Hevserokê KCDK-E’yê Yuksel Koç, Hevserokê Fed-Demê Tahîr Koçer û berdevkê eyaleta Saksonya Jêrîn ê Fed-Demê Letîf Karakaş jî amade bûn.
Çalakger bi qîrîna dirûşmên ‘Bijî berxwedana Şengalê’, ‘Bijî berxwedana YBŞ’ê’, ‘Bijî berxwedana Heftanînê’ û ‘Şehîd namirin’ ber bi Larteyê ve dest bi meşê kirin.
Meş dê roja duyemîn saet di 10:00 de li Larteyê dest pê bike û li Hannoverê bi mîtîngekê biqede. Di çarçoveya meşê de dê saet 16:00 dosyayek têkildarî Şengalê pêşkêşî Meclisa Eyaleta Saksonya Jêrîn bê kirin. Ji bo mîtînga li pêşiya Meclisa Eyaletê jî banga tevlibûnê li kurdan û dostên wan hate kirin. CELLE
