Dewa Tanerî ya qezaya Xozatî ya Dêrsimî de cinîyî baxçeyê xo ra meyweyan arê danê û pê nînan rîçal, marmelat virazenê. Dima zî nê berheman şawenê market û kooperatîfan. Nameyê markaya cinîyan zî ”Rîçalê Dewa Tanerî ya Xozatî” yo. Berhemê tabîyî yê cinîyan rê eleqeyêko pîl yeno mojnayene.
Cinîyî berhemanê bînan ê sey sîrke, salçe, rûno kele zî seba rotişî virazenê. Cinîyî serê sibayî saete 10.00 ra heta şan saete 20:00 bi hawayêkê kolektîfî xebitîyenê. Cinîyî vera vîrusê Korona zî tedbîranê xo gênê û wexto ke berhemanê xo virazenê maske, lapik û boneyan xebitnenê.
Cinîyan ra Nerîmane Akbalik bale ante ser ke dewe de pêro cinîyî îmalatxane de xebitîyenê û vat: ”Her roje muşterîyê ma ma rê telefon kenê, sîparîş danê. Seba ke hewayê dewa ma zî pak o berhemê ma zaf tabîyî yê. Ma bi sereyê xo debarê xo kenê. Bi nê hawayî ma cinîyanê bînan rê zî benê mîsal.”
Cinîyan ra Dîleke Akbalik zî hem heywankarîye kena hem zî îmalatxane de sîrke virazena. Dîleke vat: ”Ma pê xebata xo zaf sereberz ê. Ma venga cinîyanê dewan ê bînan zî danê ke wa tewrê ma bibê. Ma pîya pê kêfweşî tîya de xebitîyenê.”
Elîfe Akgul zî da zanayene ke înan banka ra kredî girewt û îmaletxane akerd. Elîfe vat: ”Kênaya mi berhemê ma dayî kooperatîfêkê Pulurî. Înan zî vat ma bivirazê ê roşenê. Ma kredî girewt û tîya awan kerd. Ma domananê xo reyde xebitîyenê. Cinîyî zî keyeyê xo de berhemanê xo virazenê anê tîya. ” DÊRSIM
