Meclisa Ciwanan a HDP’a Wanê ji bo zarokên li gundên Elbakê bûne mexdûrên erdheja di 23’yê sibatê de rû dabû kampanyaya pêlîstok, pirtûk û cilan da destpêkirin. Kampanya wê mehekê bidome û pişt re dê ev alav li zarokan werin belavkirin. Endama Meclisa Ciwanan a HDP’ê Arjîn Tuncer diyar kir ku ji bo mexdûrên erdhejê alîkariya pêwîst nehatiye kirin û ew ê bi zarokên bûne mexdûrên erdhejê re piştevaniyê mezin bikin û divê her kes destek bide kampanyaya wan.
Tuncer da zanîn ku ew piştî erdhejê gelek caran çûne herêmê li gazin û pirsgirêkên xelkê mexdûr bûne guhdar kirine û ev tişt anî ziman: “Me li wir çavdêrî kir ku dewletê tiştek nekiriye. Tifaqa AKP-MHP’ê her tim edebiyata biratiyê dike lê em wan di pratîka wan nas dikin û tiştek ji bo herêmê nekiriye. Me carek din vî tiştî dît. Ji bo alîkariya pêwîst nehatiye kirin me çavdêr kir ku zarok pir di bin tesîra erdhejê de mane. Jiyana însanan di konan û konteyniran de didome. Herî dawî lehiyek li wir rabû. Zarok carek din ketin bin tesîra lehiyê. Em jî difikîrin ku kampanyayê bidin destpêkirin û di encamê de me kampanyaya berhevkirina pêlîstok, pirtûk û cilan da destpêkirin.”
‘Hûn jî zarokan bextewar bikin’
Her wiha Tuncer anî ziman ku dê kampanya mehek bidome û axaftina xwe wiha bi dawî kir: “Kesên dixwazin daxilî kampanyayê bibin wan pêlîstok, pirtûk û cilan dikarin bînin avahiya HDP’ê ya Wanê. Ji niha ve piştevaniyek mezin heye. Gelek kesan pêlîstok, pirtûk û cilan anîn gihandin me. Li Stenbolê jî ji bo vê kampanyaya me xebat tê birêvebirin. Bi dawîbûna kampanyayê re em ê tiştên ku me berhev kiriye bibin li zarokan belav bikin. Zarok ji tiştên wiha gelek bextewar dibin. Ji bo xwedîderketina vê kampanyayê em dixwazin her kes bibe hevparê vê bextewariyê.” WAN
